O accidente produciuse ás dúas da madrugada en Trobo, na estrada LU-541que une Rábade e Vilalba
12 novs 2023 . Actualizado ás 18:57 h.Esta pasada madrugada, sobre as 2.00 horas, produciuse un accidente na estrada autonómica LU-541, á altura do punto quilométrico 6, ao paso por Trobo, no concello lucense de Begonte . O accidente produciuse cando un turismo impactou contra catro cabalos que interceptaron na vía. A consecuencia do impacto, unha persoa tivo que recibir asistencia médica e varios exemplares acabaron mortos.
A información sobre este sinistro chegou ao servizo de urxencias 112 Galicia contra as 2.20 horas desta madrugada a través da chamada de alerta dunha persoa particular. Durante a comunicación cos xestores de urxencia, informaba que a pesar de que os dous ocupantes do vehículo podían abandonalo polos seus propios medios, un deles presentaba lesións na cabeza, o que implicaba a necesidade de atención sanitaria.
Co fin de prestar apoio aos implicados e efectuar os labores de limpeza da vía, desde o 112 púxose a situación en coñecemento de Urxencias Sanitarias de Galicia-061, dos Bombeiros de Vilalba, do GES de Friol-Palas , dos axentes da Garda Civil de Tráfico e do persoal de mantemento da Axencia Galega de Infraestruturas (AXI).
Ao producirse o accidente nunha zona de rectas desta estrada autonómica, é de supor que os cabalos irromperon na calzada de forma imprevista e o coche xa non puido facer nada por impedir o impacto.
Ferido un motorista en Begonte
Por outra banda, ás 16.10 horas deste domingo, na LU-P-1611, punto quilométrico 65,180, preto do cruzamento coa N-6, no termo municipal de Begonte, produciuse un sinistro viario consistente na caída sobre a calzada dunha motocicleta, resultando ferido o seu condutor.