O popular Issam Alnagm asegura que o servizo podía ser usado sen ningún impedimento por calquera veciño
11 oct 2014 . Actualizado á 09:39 h.A situación política de Muras viviu onte un novo vaivén, protagonizado outra vez polo BNG e polo PP, que xa tiveran outros encontróns en ocasións anteriores deste mandato. O alcalde, o popular Issam Alnagm, recoñeceu que onte, durante unha mudanza particular relacionada co seu traslado a un novo domicilio, usara unha furgoneta do Concello, cuestión que merecera unhas horas antes a censura do grupo municipal nacionalista.
O alcalde murense explicou que utilizara unha furgoneta para o traslado dun só moble, sacado da vivenda que utilizaba ata o de agora, situada no centro urbano da localidade, para ser levado á vivenda que ocupa actualmente. De todos os xeitos, o rexedor dixo que ese servizo podía ser usado sen ningún impedimento por calquera veciño do concello que así o solicitase.
A vivenda que o alcalde vai abandonar definitivamente é o edificio coñecido popularmente como casa do médico. Está situado na travesía principal de Muras, antiga estrada de Cabreiros a Viveiro, e foi cedido ao Concello pola Unión Murense para fins sociais e públicos. Na primeira planta, precisamente, estaba a vivenda que agora se deixa.
Nalgún momento, ademais, chegouse a expor que a vivenda se utilizase para algún fin turístico, dando á localidade un servizo do que carece. Ata o de agora, con todo, non se deu ningún paso concreto.