Este domingo, o campo municipal do Saviñao será escenario ás cinco da tarde do derbi do Miño entre o Atlético Escairón e a SD Chantada, dous equipos que neste inicio de 2024 chegan en dinámicas distintas. Mentres o cadro de Traste cotiza á alza, o equipo de Iván González xa perdeu catro puntos.
Estes rexistros estreitaron máis a clasificación na zona nobre. O Escairón quedou relegado da segundo á terceira praza. O conxunto do Saviñao suma actualmente 44 puntos, dous máis que a SD Chantada.
Se os visitantes asaltan o municipal do Saviñao colocaranse terceiros e deixarán aos locais na cuarta praza, sentindo o alento dun Chantada Atlético que este domingo (16.15 horas) recibirá no campo municipal de Ou Sangoñedo á Milagrosa.
Os futbolistas do Escairón son conscientes do moito que hai en xogo esta xornada e no derbi. Están concienciados e convencidos de que regresarán á senda da vitoria e que os tres puntos quedaranse na casa. Iván González confía en dispoñer de todos os seus efectivos para este envite.
Pola súa banda, os xogadores de Traste non queren perder a oportunidade de dar un golpe na mesa e meterse de cheo de novo polo ascenso ao grupo norte da Preferente Autonómica.
Taboada-Xove Lago
O Taboada, que hai dúas semanas freou ao Pol cun empate, mide as súas forzas este domingo ás catro e media da tarde no campo da Medela-Canti ao Xove Lago.
Os discípulos de Martín Murado queren gañar e deste xeito dar un salto na táboa clasificatoria para ir pechando xa a que sería a permanencia.