Un fiscal especial carga contra o FBI por investigar a Trump pola trama rusa
INTERNACIONAL
Durham, nomeado polos republicanos, considera que a axencia actuou de forma parcial e con ausencia de rigor analítico
16 may 2023 . Actualizado ás 22:13 h.John Durham, o fiscal especial designado polos republicanos para avaliar a investigación do FBI sobre os vínculos de Donald Trump coa trama rusa para interferir nas eleccións do 2016, fixo público un informe de máis 300 páxinas moi crítico co labor da axencia de investigación federal. Segundo o seu ditame, o FBI nunca debería ter posto en marcha o caso, actuou de forma parcial e con «unha ausencia grave» de rigor analítico. Todo un potencial argumentario ao que Trump non dubidará en sacar rédito na súa actual campaña.
Segundo o fiscal, a axencia federal tería aberto a investigación, despois de avisar ao equipo da candidata demócrata, Hillary Clinton, sobre os intentos dun actor estranxeiro de influír nas eleccións, algo que non fixo co do magnate. Como exemplo da mala praxe do FBI, apunta a que empregou información de intelixencia «non corroborada, sen procesar nin analizar» para lanzar as pescudas.
Durham foi designado no 2019 polo entón secretario de Xustiza, William Barr, durante a presidencia de Trump, mandato no que ocupou o cargo de fiscal xeral en Connecticut. Cunha longa traxectoria ás súas costas, estivo a cargo de outras investigacións prominentes, incluíndo algunhas que involucraban ao FBI e á CIA.
A pesar de que, segundo Trump, a investigación de Durham ía revelar «o crime do século», os esforzos do fiscal especial saldáronse con só tres imputados. Dos tres, dous foron exonerados e un terceiro, un exabogado do FBI, declarouse culpable de ter alterado un correo electrónico para axudar a un colega cunha solicitude para vixiar a un asesor de Trump.
O republicano Jim Jordan, presidente da comisión xurídica do Congreso, anunciou que citará a Durham. Para o gobernador de Florida, Ron DeSantis, o informe proba que as axencias federais usaron «unha falsa teoría da conspiración sobre a colusión entre Trump e Rusia».
O FBI respondeu o informe afirmando que as prácticas que se poñen en dúbida na investigación xa deron lugar á posta en marcha de «ducias de accións correctivas». Segundo o comunicado da axencias, «se esas reformas estivesen operativas no 2016, as faltas identificadas no informe [de Durham] puidéronse previr».