Os mellores finais de tempada foron con Luis Enrique e na primeira tempada de Berizzo
11 mares 2021 . Actualizado ás 05:00 h.O Celta suma 33 puntos tras 26 xornadas e ten por disputar un total de 36 nas doce xornadas que faltan. Desde o regreso a Primeira, na tempada 2012/2013, o máximo de puntos que lograron os vigueses nesta recta final do campionato é de 19 puntos e fixérono en dúas ocasións consecutivas: con Luis Enrique na 2013/2014 e con Berizzo na 2014/2015. Ao ano seguinte, a pesar de ser o da clasificación europea, co Toto conseguiuse un menos, 18.
A recta final do ano do actual seleccionador lémbrase por un esprint que incluíra vitorias ante o Sevilla e o Real Madrid en Balaídos. Ademais, encadeara cinco xornadas sen perder, entre a 22 e a 37, con catro vitorias consecutivas. Aínda que a pechou con derrota en Mestalla, fora claramente unha tempada de menos a máis que deixara un gran sabor de boca. Tras 26 xornadas, tiñan 30 puntos.
Ao ano seguinte, con Berizzo, o tramo final do campionato tamén deixou moi bo resaibo. Dentro dos 19 puntos de 36, non se sufriu ningunha derrota nas últimas cinco xornadas e culminouse a liga cun sufrido triunfo (con remontada e expulsión de Sergio fronte ao Espanyol). A estas alturas, tras 26 xornadas, a situación era case idéntica á actual, con 32 puntos que nese momento lle colocaban na novena posición.
A campaña da clasificación para Europa, a 2015/2016, é a terceira no podio. Sumáronse 18 puntos dos últimos 36 e encadeáronse sete partidos sen perder; tres deles remataron en empate. Só se foron sen carga en tres dos últimos doce compromisos.
Un mínimo de 10
A cifra mínima de puntos que logrou o Celta na súa actual etapa na elite sobre os últimos 36 é de 10. Sucedeu no ano en que acadou as semifinais da Copa do Rey e a Europa League, descoidando como consecuencia a competición doméstica. Da última ducia de compromisos, perderon oito, cinco deles de xeito consecutivo.
O segundo peor rexistro foi o do ano pasado, con 12, mentres que hai dous anos foron trece puntos e fai tres, catorce que valeron a salvación, igual que na tempada 2012/2013, primeira desta etapa.