O príncipe Guillermo e o seu fillo Jorge asisten a un partido de fútbol tras o anuncio de cancro de Kate Middleton
XENTE
Trátase da primeira aparición pública do herdeiro ao trono desde que o pasado 22 de marzo a súa esposa confirmase que está a se someter a un tratamento oncolóxico
12 abr 2024 . Actualizado ás 10:25 h.O príncipe Guillermo e o seu fillo maior, o príncipe Jorge, asistiron xuntos a un partido de fútbol do seu equipo, o Aston Villa , no estadio do club en Birmingham, centro de Inglaterra, onde foron vistos onte á noite en público por primeira vez desde o anuncio do cancro da princesa de Gales, Kate Middleton.
Ao príncipe de Gales víuselle riseiro e aplaudiu os goles do conxunto inglés, no partido de ida da Liga de Campións disputado fronte ao Lille (2-1).
O príncipe Jorge, de 10 anos, segundo na liña de sucesión ao trono británico, levaba unha bufanda do Aston Villa e tamén se lle viu alegre pola actuación do seu equipo.
En marzo, a princesa de Gales, de 42 anos, revelou que se somete a un tratamento oncolóxico, do que non precisou máis detalles. «En xaneiro, sometinme a unha importante cirurxía abdominal en Londres e nese momento críase que a miña enfermidade non era cancerosa. A cirurxía foi exitosa. Con todo, as probas realizadas tras a operación acharon que houbera cancro. Polo tanto, o meu equipo médico recomendou que me sometese a un tratamento de quimioterapia preventiva e atópome agora nas súas fases iniciais», dicía nun vídeo difundido o pasado 22 de marzo.
Kate Middleton agradeceu o apoio que moitos lle brindaron nestes meses e explicou que unha das razóns para manter a privacidade ao redor do seu estado de saúde foi asegurarse de informar e tranquilizar en primeiro lugar aos seus tres fillos «dun xeito adecuado para eles». «Como lles dixen a eles, estou ben e máis forte cada día centrándome nas cousas que me axudarán a curarme, na miña mente, o meu corpo e o meu espírito», salientou. Nun primeiro momento díxose que Kate Middleton e o príncipe Guillermo agardaran ás vacacións de Pascua para revelarlles aos seus fillos o cancro que sofre, pero uns días despois sóubose que todo se precipitou ante o risco de que se fixese pública a enfermidade por outras fontes. Tamén transcendeu que unha rede de desinformación rusa propagou todo tipo de rumores sobre a saúde de Kate Middleton.
Os príncipes de Gales e os seus tres fillos —Jorge, Carlota e Luis— non estiveron na recente misa de Pascua na capela de San Jorge do castelo de Windsor (nos arredores de Londres), á que tradicionalmente acode a familia real británica.
A ese servizo relixioso asistiu o rei Carlos III, quen tamén se somete a un tratamento polo cancro que se lle diagnosticou, do que non hai detalles.