Unidade política para reclamar a Renfe mellores horarios e bonos para viaxar en tren por Galicia

PP, BNG e PSdeG aprobaron na comisión parlamentaria de Obras Públicas solicitar ao Goberno de España que faga un esforzo na reorganización de horarios no eixo atlántico ferroviario A Coruña-Vigo para garantir transportes que se axusten ás necesidades laborais e familiares, mellorando a puntualidade do servizo; e que aplique unha política tarifaria que inclúa descontos para os usuarios na liña Ourense-A Coruña. Trátase de dúas demandas cidadás intensificadas nos últimos meses, sobre todo desde que o AVE entrou en Galicia, o que provocou algúns cambios nas frecuencias. 

A proposición non de lei partiu do grupo nacionalista e foi defendida polo deputado Luís Bará, quen afirmou que se trata de dúas reivindicacións que cobran maior sentido se cabe ante a crise económica e o prezo dos hidrocarburos, que penalizan as viaxes particulares. No seu contido, o Bloque especifica a necesidade de adiantar a saída do tren das 6.40 de Vigo e que chega á Coruña ás 8.13 horas, así como o atraso da saída desde a cidade herculina máis tarde das 15 horas. Ademais, reclámase a reposición dunha frecuencia diaria A Coruña-Vigo con saída ás 18 horas; e un estudo para axustar os tempos de saída a pola mañá en dirección sur.

O acordo implica unha solicitude para mellorar a puntualidade dos servizos e a flexibilización dos abonos, tanto nas modalidades como no prazo de vixencia, coa posibilidade de utilizalos en calquera das frecuencias existentes. Neste punto, Bará fixo mención á «discriminación» económica que sofren os usuarios da liña Ourense-A Coruña, cunha solicitude para que se inclúan descontos por motivos económicos, sociais, de idade e familiares. «Non podemos centrar toda a nosa atención na conexión con Madrid e deixar de lado os problemas do tren de media distancia», reflexionou antes de felicitar aos colectivos cidadáns que se están mobilizando para conseguir uns horarios e unhas bonificacións dignas.

No debate da proposición houbo rozamentos entre os grupos pola política ferroviaria, pero a deputada popular Noelia Pérez afirmou que «imos estar sempre a favor das iniciativas encamiñadas a promover a mobilidade dos galegos a través dun tren moderno e de calidade que complemente o transporte interurbano». Con todo, denunciou que o Goberno de España «leva meses escudándose na pandemia para eliminar servizos e frecuencias, a pesar de que o eixo atlántico consolídase como o segundo núcleo máis importante na media distancia en España».

Pola súa banda, a deputada socialista Noa Díaz apoiou uns «peticións razoables» para o tren, en coherencia coa reclamación feita á Xunta para que tamén adapte os horarios do transporte por estrada. Díaz coincidiu cos seus colegas en que se trata de liñas de «alta demada» que deben ser «unha prioridade» como o foi o AVE para o actual Goberno, defendeu.

Os trens Avril

Noutra proposición, o grupo parlamentario popular demandou que a Xunta teña información directa das intencións do Goberno para o desenvolvemento de infraestruturas ferroviarias en Galicia, das que se teñen noticias «polos medios e polas respostas a deputados», lamentou o popular Diego Calvo, quen pediu un calendario para coñecer a chegada dos tres Avril de ancho variable que facilitaría a chegada da alta velocidade a Santiago «e ao resto das cidades». O portavoz de Infraestruturas reclamou ao Ministerio un compromiso «claro» e aproveitou a súa intervención para pedir que se cumpran os tempos previstos.

Tamén obtivo o apoio do PSdeG e do BNG, aínda que os socialistas puntualizaron que o calendario para a chegada dos trens Avril segue fixada para «ou verán», e demandou tempo para que os técnicos tomen decisións sobre a estratexia do ancho ferroviario en España. A Bará pareceulle «artificioso» insistir agora nun debate menor despois de dez anos de espera polo AVE  a Ourense que o nacionalista atribuíu ao pique entre o PP e o PSOE por atribuírse os «méritos».

---

---

---