A Lei de Vivenda abre outra fronte legal entre a Xunta e o Goberno de España con millóns en xogo
GALICIA
A conselleira Ángeles Vázquez xustifica o recursos e cre que o texto «ensombrece un momento crucial»
23 mares 2022 . Actualizado ás 21:53 h.A Xunta de Galicia vai abrir unha nova fronte xudicial co Goberno de España pola Lei de Vivenda estatal, que se está tramitando nestes momentos con dúbidas sobre a súa constitucionalidade expresadas por varias comunidades e plasmadas nun informe do Consello Xeral do Poder Xudicial no que se advirte dunha invasión de competencias autonómicas. O inminente recurso do Executivo galego confirmouno este mércores no Parlamento a conselleira Ángeles Vázquez, quen recoñeceu que esta situación «ensombrece un momento crucial» para as políticas de vivenda, cunha forte aposta de investimento dos fondos europeos e a apertura de varias liñas específicas de axudas para reforzar a rehabilitación e a posta no mercado de máis vivendas de alugueiro social. Para a execución destas partidas é esencial a colaboración entre o Ministerio e a Xunta, que é a Administración encargada de deseñar os programas, que contan co respaldo económico máis alto da historia.
A titular autonómica de Vivenda afirmou na Cámara que nesta fronte estarán outras comunidades gobernadas polo PP, convencidas dos excesos dunha lei na que tamén aprecian medidas con «efectos perversos», como a limitación dos prezos do alugueiro.
O texto superou o primeiro escollo no Congreso pese ao rexeitamento de cinco grupos e ás advertencias institucionais, remarcou Vázquez, que contestaba a unha pregunta do seu propio grupo parlamentario formulada pola popular Begoña Freire.
Presión da oposición
A tensión ao redor das políticas de vivenda ten un longo historial no Hórreo, pero non é casual que o grupo socialista presentase nesta mesma sesión unha proposición non de lei denunciando a «negativa» da Xunta a axilizar as axudas estatais para favorecer a emancipación dos mozos, un asunto que tamén protagonizou as últimas iniciativas desde o BNG. A deputada Noelia Otero (PSdeG) cre que tras a confrontación dos populares hai «desinterese e nula vontade» por activar os programas de vivenda, nos que, asegurou, deixáronse sen executar 400 millóns na última década.