O conxunto barreirense conseguiu o primeiro título de liga en 21 anos e o ascenso máis rápido nesta campaña en Galicia
03 mares 2024 . Actualizado ás 13:03 h.Esta campaña 2023-2024 do Celta Barreiros está sendo histórica por dous motivos principalmente: o pasado 3 de febreiro lograron o ascenso a Segunda Galicia -o máis rápido do ano en Galicia nas categorías sénior- e nesta pasada fin de semana conseguiron un título de liga 21 anos despois para o club. O último conseguido polos barreirenses foi na campaña 2002-2003 cando ascenderon a Primeira Rexional.
O principal artífice deste logro é Rubén Acebedo, o seu adestrador. O pontenovés chegou ao cargo este verán e desde entón sumou 17 vitorias, un empate e unha derrota en liga nos 19 encontros disputados, ademais doutro picazo na Copa Deputación ante a Piringalla. Para o preparador foi fundamental a seriedade coa que adestraban os xogadores e a boa pretemporada que fixeron. «No verán adestramos tres días pola semana porque había rapaces que ían a estudar fora e iso provocou o gran comezo que tivemos. Despois tan só era darlle continuidade ao longo do ano adestrando dous días», remarcou.
A boa sintonía entre os xogadores novos cos máis veteranos foi outras das claves da boa temporada. Para o adestrador esa combinación é o perfecto para un vestiario. «Ninguén contaba a principio da tempada que a adaptación fora tan boa. Incluso deberíamos de ter algún veterano máis para estas categorías xa que a nosa media de idade non chega aos 20 anos», remarca.
O único «pero» do Celta Barreiros nesta magnífica temporada foi a derrota na Copa Deputación ante a Piringalla (0-1). Non obstante, para Rubén mereceron máis: «Sabiamos que ía a ser un partido difícil xa que é un equipo da fase de ascenso pero creo que merecemos gañar porque o gol deles foi en propia meta e nós tivemos moitas ocasións para gañar o encontro».
A pesar de que aínda quedan tres partidos para que remate a liga, Rubén xa está planificando a nova tempada na Segunda Galicia. Para o ano que vén xa temos fichado a Toni, central do Guitiriz, pero que por temas de traballo xogou este ano alí. E tamén hai dous rapaces que tiven na base do Ribadeo que tamén están fichados. Teño que esperar a falar cos demais xogadores xa que espero que siga á maioría», conclúe Rubén.
«Alégrome moito do que conseguimos, sobre todo polo esforzo da directiva e dos xogadores»
Tras un curso anterior moi complicado, co descenso a Terceira Galicia, onde tiveran problemas para encontrar xogadores e incluso para non poder competir, Rubén alégrase dos feitos desta campaña, principalmente polos xogadores que estiveron o ano pasado (que o pasaron moi mal) e pola directiva que a conforma. «Hai moitas persoas que lle dedican moitas horas a que o campo estea ben, a que os rapaces non lles falte nada... Temos unha estrutura de Primeira Galicia grazas ao esforzo destas persoas».
Para esta nova andadura en Segunda Galicia, Rubén recoñeceu que xa lle ofreceron a renovación para que continuara ao mando do equipo nesta nova categoría e afirma que xa está «encamiñada» e que non debería haber ningunha sorpresa. O preparador da Pontenova está a espera de reunirse cos xogadores desta campaña para ver se alguén non quere continuar. «Se algún non segue, teríamos que reforzarnos na zona de ataque», concluíu o artífice dun curso para o recordo.