O Noia mantén a súa serie triunfal ante o Galicia Mugardos e mete máis terra polo medio cos seus perseguidores (2-1)
FUTBOL GALEGO
Os barbanceses sufriron ao final, cando os visitantes apertaron metendo máis xente no ataque e conseguiron recortar distancias
18 feb 2024 . Actualizado ás 19:53 h.O Noia está nun gran momento. Son xa 11 as xornadas consecutivas nas que suma puntos. Este domingo foron tres máis ao derrotar ao Galicia Mugardos (2-1) e a diferenza agora co Boiro, que é segundo, xa é de catro e co terceiro clasificado, o San Tirso, vaise ata os oito.
No Julio Mato Matito, os noieses dominaron ao Galicia Mugardos aínda que ao final acabaron pasando apuros. Na primeira parte, o control do xogo tivérono os brancos, do mesmo xeito que as ocasións. O gol chegou no minuto 39, cando Xabi Castiñeiras cazou un balón que chegou á área dunha falta lateral. Tivo tempo a controlar e rematar para bater a David Gómez.
Con ese tanto de vantaxe chegouse ao descanso. A mala noticia nos primeiros 45 minutos foi que Anxo tivo que retirarse do campo lesionado.
Á volta dos vestiarios mantívose a mesma tónica e, no 53, Brian ampliou a renda para os barbanceses.
A partir do segundo gol o partido entrou nunha fase de calma, na que o Noia tivo algunha contra para finiquitar o duelo, pero non o fixo.
No tramo final apertou o Galicia Mugardos metendo máis xente arriba. Os locais tiveron que defender moi atrás e achicar balóns. Nunha boa xogada, os visitantes recortaron distancias cun tanto de Berreta. Pero xa era o desconto e non deu tempo a máis.
«Tras os resultados do sábado era moi importante conseguir a vitoria, máis sabendo que a próxima xornada temos unha difícil saída ao campo do Sigüeiro», sinalou Iván Carril, técnico dos noieses, ao finalizar o choque. O adestrador mostrouse moi satisfeito polo resultado e polo rendemento do equipo: «En liñas xerais estou contento. Agora toca traballar máis que nunca para manter esta boa liña».