Unha promoción de 51 vivendas xera expectación en Espasante: «É un recuncho moi especial»
ORTIGUEIRA
O edificio, con pisos desde 115.000 a 140.000 euros, estará acabado en agosto
26 mares 2024 . Actualizado ás 15:55 h.As obras comezaron en setembro de 2023 e, se nada se torce, estarán listas en agosto. O edificio Punta dous Prados, que quedou a medio facer (co peche de ladrillo e a cuberta) por mor da Gran Recesión, xa empeza a parecerse ao do proxecto de Promocións Moreda, a empresa de Foz que se fixo co inmoble. «Imos segundo o previsto, temos a moitas persoas traballando aquí para poder chegar na data programada», explica o xerente da firma, Francisco Moreda, contento coas vendas —«xa pechamos varias»— e con boas expectativas.
Son 51 vivendas, a maioría de dous dormitorios. «Os áticos son abuhardillados, con moi boas vistas; na planta alta teñen salóns con terracitas e na baixa, con terrazas moi grandes», describe. En canto aos elementos comúns, destaca «as cociñas equipadas con todos os electrodomésticos» e as calidades: «Por exemplo, o porcelánico nos baños, rectificado en gran formato, os pratos de ducha de 140 x 80 extrafinos, a iluminación indirecta na parte alta da cociña e no teito do salón, as portas brancas con xunta de goma para evitar portadas e aumentar o illamento acústico...».
Todos os pisos dispoñen de praza de garaxe e na parte de atrás da urbanización acondicionaranse uns 1.500 metros cadrados de zona axardinada, con grelladas, árbores ou unha piscina. «En ladrillo era máis difícil vender, pero agora xa se pode ver practicamente todo, os azulexos postos...», recalca Moreda. Os prezos móvense entre os 115.000 e os 140.000 euros, en función non só da superficie senón da localización, polas vistas, e o tipo de terraza.
Os compradores buscan unha segunda residencia. «Sorprendeunos o perfil de cliente, case todos teñen algunha conexión con Espasante, ou está no estranxeiro, retorna e quere a súa vivenda onde naceu e criar, ou emigrou e volve xubilado a pasar tempo onde están as súas raíces, ou leva moito tempo veraneando de alugueiro ou en casa de amigos, gústalle Espasante e quere investir aquí...», debulla o promotor. Son minoría os que se interesan por estas vivendas sen algún vínculo previo con esta localidade costeira de Ortigueira .
Moreda defende este pobo como destino turístico e residencial, e reivindica o papel de «axente dinamizador» que exerce a súa empresa: «É a primeira obra nova que se fai aquí en case vinte anos. Foi unha aposta moi arriscada pola nosa banda, pero estamos contentos. Espasante é un recuncho moi especial». Sobre outros proxectos urbanísticos ligados a este pobo, móstrase cauto: «Hai que facer as cousas ben, con calidades e conciencia da contorna, aos poucos e en función das nosas capacidades e da demanda, de forma sostible no tempo».