O vento, que xa superou os 130 quilómetros por hora en Cedeira, tira árbores, cables, tezas e colectores
ORTIGUEIRA
Policía Local e persoal municipal retiran un piñeiro nas Pontes e o GES de Ortigueira aparta outra árbore que invadía a estrada en Mera
22 feb 2024 . Actualizado ás 16:06 h.Os refachos de vento xa superaron os 130 quilómetros por hora (130,79) en Punta Candieira, en Cedeira , ao longo desta mañá. Sopra con forza desde primeira hora e as consecuencias xa se deixaron sentir nas estradas da comarca. O Grupo de Emerxencias Supramunicipal (GES) de Ortigueira tivo que retirar, con axuda dun camión, unha árbore que invadía os dous carrís da AC-862, preto do antigo restaurante O Muchacho, en Mera.
Nas Pontes, axentes da Policía Local e persoal municipal apartaron un piñeiro de grandes dimensións que se caeu sobre a vía DP-7003, no polígono dos Airíos. Na localidade ponteses desprendéronse varias lousas de tellados de inmobles das rúas Celso Emilio Ferreiro e Cabanas. O vento tamén derrubou sinais de tráfico na avenida da Coruña.
O GES de Mugardos tivo que desprazarse á zona do Seixo, neste municipio, para cortar unha árbore, e tamén recibiu aviso da caída de cables de telefonía en Valdoviño , onde o vento tirou varios colectores. Nas Somozas caeu outra árbore polo vento.
O GES de Ortigueira apartou un cable da iluminación pública en Cariño , á primeira hora da mañá. Unha veciña de San Adrián alertou de que o vento estaba levantando as uralitas da súa vivenda. E en Cerdido precipitouse un poste de telefonía, o que bloqueou temporalmente o acceso a Lamigueiro Novo polo Piñón.