A familia Carpente Rico de Neda desvela os seus disfraces de entroido: «Imos de Olimpíadas»
NEDA
Coñecidos polas decoracións da súa vivenda en datas sinaladas, agora gozan nunha comparsa
09 feb 2024 . Actualizado ás 16:07 h.Neda puxo en marcha o entroido cunha programación especial Entroido 2024 coa vista posta no tempo e coas comparsas do municipio e do resto da comarca como protagonistas da primeira gran cita, á que se sumaron nove agrupacións, entre elas dúas de Neda, As Caralletas e A Canteira do Puntal. Nesta última comparsa atopamos á familia Carpente Rico, que nesta ocasión retoma a celebración do entroido participando, como antes da pandemia, co colectivo formado por veciños da zona do Puntal.
Diego Carpente sinala que «este ano imos cos nosos compañeiros da comparsa A Canteira, Imos de Olimpíadas». Mónica e Omaira van de mascotas olímpicas e el, de lanzador de xavelina.
Este ano non decoran a súa casa e dedicáronse a confeccionar as súas orixinais vestimentas. Así, atopámoslles hai uns días en plena faena. Cóntannos que o sábado 16 estarán no Puntal para facer unha ruta animando aos veciños e rematar coa celebración no Fariña e Brasa.