A praza aspira a converterse en motor de dinamización do casco antigo
20 abr 2015 . Actualizado ás 05:00 h.Tras máis dun ano pechada baixo sete chaves, a praza de abastos de Pontedeume prepárase para someterse a unha minuciosa operación de cirurxía estética que non só lle permitirá lucir un aspecto renovado, senón tamén estrear un novo concepto de mercado. Cunha inxección económica de 1,6 millóns de euros, o encargado de dirixir a batuta da operación será o Concello de Pontedeume, que conta xa co proxecto básico de rehabilitación realizado polo estudo de arquitectura compostelán Carbajo e Barrios.
«O obxectivo é que o mercado vaia máis aló do seu uso tradicional; é dicir, que ademais de reivindicar o seu papel como posto de venda de produtos locais, tamén poida funcionar como un espazo destinado á restauración ou ao lecer e convértase nun auténtico polo de atracción turística», resume Manuel Carbajo, coautor do proxecto xunto a Celso Barrios.
Tendo en conta ese novo concepto de mercado -que segue o ronsel doutros como o de Santiago de Compostela ou o de San Miguel de Madrid- o proxecto contempla dúas grandes actuacións. Por unha banda, a rehabilitación do edificio orixinal deseñado por Antonio Tenreiro no ano 1941 e executado en 1954 . E, por outra banda, a demolición dos engadidos «pouco respectuosos» que se levantaron na parte traseira nos anos 70, en cuxo lugar se construirá un novo edificio acristalado que terá unha cuberta sobre a que se creará unha praza aberta á rúa San Miguel, para o que será necesario tirar abaixo o inmoble da Cámara Agraria, situado xusto detrás do mercado, pero a un nivel superior. «Esta nova praza funcionará como unha especie de atalaia desde a que se poderá ver o torreón dos Andrade, a praza do Conde e a ría eumesa», explica Carbajo.
As dúas construcións do mercado estarán unidas por corredores laterais e entre elas haberá un patio interior no que está previsto que se poidan desenvolver eventos gastronómicos, mercadillos ou mesmo actividades culturais. En total, a praza disporá de 16 postos (oito no edificio antigo e outros oito no novo), pero tamén contará cunha cafetería dotada de cociña, unha oficina de atención ao público e dependencias para vestiarios, obradores, cámaras frigoríficas e cuartos de lixo.
«A meta pasa por rendibilizar márcaa mercado de Pontedeume, pondo en valor unha praza moi atractiva tanto pola súa estética, entre rexionalista e racionalista, como pola súa localización. Non todos os pobos gozan dun mercado histórico como este e iso hai que aproveitalo para convertelo nun motor de dinamización», reivindica Carbajo. «Do que se trata -engade- é de realizar unha actuación respectuosa coa tradición, pero dándolle un impulso cara a unha época nova».