Adeus ao sempre riseiro Kiko Corzo de Xuvia: «Un amigo irrepetible, un fillo exemplar»

A esa estirpe de persoas que sorrín mesmo nas traxedias pertencía Kiko Corzo. Veciño de Xuvia , auxiliar de farmacia durante máis de 40 anos, Francisco Manuel Corzo Freire (coñecido por todos como Kiko) falecía o pasado xoves aos 62 anos de idade. E detrás deixa a un grupo de amigos tan conmocionado que este luns lle dedicarán unha misa ás 18.30 horas na igrexa de Santa Rita. Rostro conocidísimo en Narón, sempre afable e sempre atento, traballou en farmacias de Freixeiro, Piñeiros e O Alto sendo moi apreciado por todos os seus clientes. «Un amigo irrepetible, un fillo exemplar», así o lembran as súas amizades. 

A súa carreira profesional empezouna na farmacia da familia Freire, situada primeiro onde agora está o Froiz de Freixeiro. Cando abriu o centro de saúde de Narón en Piñeiros, o establecemento instalouse onde estivo despois o estanco dese barrio. E nos últimos anos traballou na farmacia do Alto, tamén dos Freire. Como indican os seus amigos, «el era dunha familia moi coñecida de Casadelos, hai dous anos morreu o seu irmán Cristóbal tamén por unha longa enfermidade e quédalle viva a súa nai de 86 anos». 

Gran seguidor dos deportes polos medios de comunicación ata o punto de que «podería participar nun concurso e gañalo», era sobre todo «un excelente amigo, moi boa persoa e afable, sempre co sorriso na cara e dedicado nos últimos tempos ao coidado da súa nai».

Como o lembra o seu amigo Fernando Masafret, inseparable de Kiko xunto a Laly Mouriz, «estes dous últimos anos foron moi duros para ti e leváchelos no máis absoluto silencio e discreción, renunciaches a moitas cousas e só che preocupaches polo benestar da túa nai sendo un exemplo de fillo». Desde Xuvia lamenta que «coa marcha de Kiko tamén se vai parte da vida dos seus amigos, foi o meu confidente e compañeiro de viaxe con moitos anos de complicidade e risos». 

---

---

---