Multiplícanse os negocios en Ferrol que recollen paqueteria: «Chegamos a recoller e entregar 150 paquetes ao día, necesítase a unha persoa só para iso»
FERROL
Ante o aumento da compra e venda por Internet proliferan os locais que, con outra actividade, tamén recollen ou entregan paquetería; xa son máis dunha trintena
29 feb 2024 . Actualizado ás 05:00 h.Para a cafetería María 51, o seu servizo de recollida de paquetes empezou de forma «natural» fai tres anos. «Xa nolos deixaban moitas veces os veciños cando non estaban en casa e sempre pensabamos, ‘se cobramos un euro, facémonos ricos'. Ricos, ricos... non nos imos a facer, a verdade, pero decidímonos a facernos punto de recollida de paquetes por mor dunha vez que me tocou ir ata Fajardo, creo, a recoller un meu», lembra Daniel López, á fronte do establecemento. Así foi como empezou o hostaleiro de forma precoz a dar un servizo, eles de recollida de paquetes da compaña UPS, que se expandiu como a espuma polo centro da cidade.
Tres anos despois, as compras e vendas de produtos de segunda man por aplicacións móbiles converteuse nunha acción máis do día a día. Por exemplo, segundo un estudo do INE, case 373.000 galegos de 16 a 74 anos empregan plataformas de Internet para dar saída a produtos que non necesitan, por exemplo, en aplicacións mundialmente coñecidas como Vinted ou Wallapop. «Creemos que é un bo xeito de que a xente entre na tenda e coñeza o negocio ao vir recoller o paquete», explica Iago Gómez, un dos responsables da tenda de roupa vintage Chavs Clothing, que se sumou hai unha semana á listaxe de empresas Punto Pack, de In Post. Notárono xa? «É moi pronto, pero a verdade é que hai moito tránsito de paquetes e entra moita xente», valora.
Os municipios da ría contan xa cunha trintena de locais que funcionan como Punto Pack ou Locker de InPost. En que consiste este último? É talvez o servizo máis novo xa que facilita ao extremo recoller ou mandar o paquete. Só é necesario introducir un código cuns díxitos que envíe a empresa ao particular por correo electrónico. Suprime colas e horarios. Punto Celeritas, outra marca, conta con media decena de locais adheridos.
«Veño correndo nun oco que teño na universidade», comenta con présas Natalia Álvarez, veciña do barrio de Esteiro. Disponse a recoller un paquete de Amazon no locker instalado desde hai meses na lavandería A Fervenza do barrio, onde tamén conta con espazo InPost —o paquete recóllese achegando o móbil e abrindo a aplicación. «É comodísimo porque na miña casa nunca estamos, así que non tes que preocuparche polo repartidor, e a lavandería ten un horario súper amplo de luns a domingo. Para o meu é xenial. Nós —polas súas compañeiras de piso universitarias— acabamos facendo moita compra de produtos de casa por Amazon, con rebaixa, e recóllelo aquí ao día seguinte. Aínda que agora, cada vez máis, hai refachos nas que está cheo e non se pode pedir. Púxose demasiado de moda», explica.
A este servizo de recollida en cabinas cun móbil e un código hase sumado tamén Correos cos seus Citypaq situados nas súas oficinas e no campus universitario de Esteiro.
Tamén incrementou exponencialmente o volume de paquetes que recollen as tendas con estes servizos asinas como do imperio de Inditex como Zara, H&M ou compañas chinesas como Shein, Temu ou AliExpress, que tamén dispoñen desta opción de recollida no canto de obrigar ao cliente a agardar en casa ou ir á tenda.
Pero o volume é tan grande en Ferrol que houbo negocios que se viron obrigados a parar. «Viñéronnos preguntar se nos interesaba ser Punto Pack pola nosa hora, porque estamos en horario de 9 a seis da tarde continuado. Dixéronnos que non nos preocupásemos porque sería máis ou menos unha saca de paquetes diarios. Ao final estabamos con catro ou cinco», lembra Estefanía Vázquez, da Zapatería Miguel. O seu negocio durou así oito meses.
«Supón, aproximadamente, 150 paquetes diarios, 150 persoas que veñen cada día a recollelos, máis quen os traen. Era unha tolemia. Teriamos que ter a unha persoa só exclusivamente para atendelo. E economicamente é inviable. Pagan moi pouquiño por cada paquete», explica. O mellor, a exposición que lle deu ao negocio. «Notamos un aumento de cliente máis novo, que eran os que menos viñan. Ao vir cos paquetes sorprendíanse co que se pode facer cun zapato ou un bolso».