Yolanda Díaz con Marta Lois en terra de loita obreira: «O Papa díxome que era clave reducir a xornada laboral»

Ría de Ferrol, territorio de working class heroes. E berce de Yolanda Díaz, ministra de Traballo e líder de Sumar que este sábado chegou á praza de Ferrol Vello de abrazo en abrazo. Ovacionada mesmo polos clientes das terrazas, rodeouse de históricos do sindicalismo do naval, membros do antigo goberno de Ferrol en Común ou mulleres de marzo do 72 (cando a policía franquista matou a dous obreiros de Bazán nunha manifestación). Chegaba a Ferrol ao día seguinte de ser recibida polo Papa pero tamén minutos despois de que Pedro Sánchez lle roubase un titular: o martes o Consello de Ministros aprobará a subida do salario mínimo interprofesional. Moi emocionada, Díaz apoiou á candidata de Sumar Galicia, Marta Lois, «unha gran persoa», definiuna. «Pido o voto para ela para anticipar a primavera», dixo. E celebrou a súa visita esta semana a o Vaticano, de onde arrincou algo máis que fervor para as eleccións: «O Papa díxome que era clave reducir a xornada laboral, que era clave ter tempo para vivir».

A sombra do Pontífice sobrevoou o acto, ata o punto de que Íñigo Errejón (recentemente elixido portavoz de Sumar no Congreso relevando a Marta Lois) lembroulle: «Como che dixo o Papa, non afrouxes, non afrouxes». A formación de esquerdas súmase aos datos achegados por Yolanda Díaz: «Nas xerais as formacións progresistas lograron 810.000 votos en Galicia, e a última maioría absoluta de Feijoo só tivo 627.000 votos... para derrocar ao PP de Alfonso Rueda non chega co BNG e o PSOE, hai que votar a Sumar». Ao seu lado, a candidata Marta Lois mostrouse convencida de que «seremos o motor dun cambio histórico o 18 de febreiro».

Ante un público entre o que figuraban desde o exalcalde de Narón, José Manuel Blanco , ata o fillo de Xousei Manuel Beiras, Dani Beiras, ou a produtora Chelo Loureiro, a ministra de Traballo celebrou «estar na terra dos meus pais e de loitadores como o recordado Fernando Miramontes, ou de Concepción Arenal». «Estou aquí tras unha semana longa onde estiven en México ou en Roma co Papa, pero cun fío vermello de mellorar os dereitos dos traballadores en toda Galicia», abundou unha Díaz que teme que «os galegos pensen que é imposible derrotar na Xunta ao PP pero este país envellecido tamén ten dereito a soñar, non é verdade que os galegos sexamos conservadores».

A  ministra definiu a Sumar como «forza laborista que fixo dos ERE o mellor mecanismo de protección social, dicían que me cargaría ao país pero ao final salvamos o país». Fixo gala dos seus logros como ese SMI que experimentará un novo incremento ou a reforma laboral: «Rajoy soñaba cunha España de 20 millóns de ocupados e xa temos máis de 21 millóns». A súa seguinte loita pasa pola redución da xornada laboral, cunha clara chiscadela a posibles desencontros co equipo de Pedro Sánchez nese aspecto: «Dentro do Goberno temos problemas e por iso pido axuda cos vosos votos para reducir esa xornada laboral».

A candidata de Sumar Galicia, Marta Lois, fixo fincapé nas políticas destinadas aos traballadores «nesta cidade de obreiros onde tivemos a Jorge Suárez como mellor alcalde de Ferrol, con quen compartín esas loitas municipalistas que foron semente do que temos agora». Pola súa banda, a ministra tamén tivo palabras para Pablo Iglesias , pero para o fundador do PSOE, non para o seu antigo compañeiro e hoxe claramente enfrontado á ministra: «A primeira manifestación de Pablo Iglesias Posse foi para pedir a reducción da xornada laboral e nós temos que seguir con esa loita».

Como teloneiro, Errejón atreveuse a unhas palabras en galego e a crer nas enquisas do CIS: «Indican que la mayoría de los gallegos necesitan un cambio, la herramienta del PP es la desmoralización pero sin Sumar no habría una subida del salario mínimo; porque este país no puede vivir solo del turismo y el eucalipto». 

  

---

---

---