Un anticiclón para votar, pero con chuvascos pola tarde no norte
ELECCIÓNS GALEGAS 18F
As máximas nas provincias do sur oscilarán entre 19 e 21 graos e na Coruña e Lugo non superarán os 15
17 feb 2024 . Actualizado ás 19:58 h.O máis importante que se debe comentar do prognóstico para este domingo é que non será unha xornada de temporal. Nin de choiva nin de vento. Xa que logo, a meteoroloxía non impedirá que os galegos poidan saír a votar. Con todo, resulta do todo necesario engadir que o tempo non será igual en toda a comunidade.
Hoxe, os galegos acudirán ás urnas coa influencia das altas presións, situadas ao oeste da Península. Desde esta posición non conseguirá xerar nordés. Neste caso, soprará do noroeste. Esta é unha circulación do aire que combina frío e humidade. Tamén é un vento que afecta con maior intensidade ao noroeste da comunidade, é dicir, á á provincia da Coruña, aínda que tamén a Lugo.
A xornada arrincará con suroeste. Este vento tamén vén cargado de humidade, aínda que é máis cálido. Así, os galegos máis madrugadores que acudan aos colexios electorais atoparanse cun ceo bastante cuberto e un ambiente térmico que podería cualificarse como suave. A sensación térmica é algo subxectivo, pero no mes de febreiro mínimas por amais dos dez graos pódense considerar agradables. As nubes estarán máis presentes nas provincias atlánticas, mentres que na metade este haberá grandes claros. Sobre todo canto máis cara ao interior, lonxe da fonte de humidade. Iso si, en Lugo e sobre todo en Ourense o amencer será algo máis xélido.
A medida que vaia transcorrendo a xornada, o vento rolará a noroeste. Isto achegará aire frío nas capas altas da atmosfera que será a fonte de achegar inestabilidade á metade norte. Así, mentres os galegos do sur poderían seguir acudindo ás urnas sen necesidade de paraugas, nas provincias da Coruña e Lugo por momentos si que será necesarios, sobre todo para aqueles que decidan votar a última hora. Aínda que un matiz moi importante é o tipo de choiva, de carácter intermitente. Hai unha probabilidade alta de que xusto cando acuda a exercer o seu dereito non chova.
En canto ás temperaturas, ese cambio na dirección do vento apenas se notará na metade sur. De feito, as máximas oscilarán en cidades como Vigo, Pontevedra e Ourense entre os 19 e 21 graos. Mentres, na Coruña e Lugo os valores diúrnos empezarán a descender de xeito progresivo. En Santiago e Ferrol non superarán os 15 graos. O noroeste provocará, ademais, que a sensación de frío estea algo por baixo dos que marcan os termómetros.
En definitiva, un día típico do febreiro galego con algúns ballóns pola tarde na metade norte e con temperaturas máis baixas na Coruña e Lugo que en Pontevedra e Ourense, onde se agarda unha xornada seca e algo máis cálida.
Mañá, o vento do norte queda para pasar a resaca electoral. Iso si, será de compoñente leste. Desaparecen as choivas, soben as máximas e baixan as mínimas.