O tempo para o 18F: altas presións, pero choivas débiles no norte

Cando se convocaron as eleccións para o 18 de febreiro, seguro que moitos galegos pensaron que terían que saír con paraugas a votar. Con todo, febreiro non se atopa entre os meses máis chuviosos. O podio ocúpao decembro, novembro e xaneiro.

Nalgunhas cidades galegas mesmo caen máis precipitacións en abril que no segundo mes do ano. Nesta época o anticiclón dos Azores xa empeza a asomar timidamente e iso permite que aumenten as posibilidades de tempo seco. Por outra banda, ao contrario que outubro, máis chuvioso, a menor temperatura do aire e do Atlántico xogan en contra de que poidan producirse grandes cantidades de auga.

Este domingo dominará o sistema de altas presións. Pero como adoita ser habitual, en meteoroloxía hai que prestar atención aos matices, que neste caso vén da man do vento.

Normalmente, cando o anticiclón dos Azores protexe a Galicia das borrascas adoita xerar nordés, o máis famoso dos ventos que sopran na comunidade galega. Unha circulación do aire que sempre favorece á metade sur e non tanto ás provincias da Coruña e Lugo, onde sopra forte e sempre resta calor ao ambiente.

Na xornada electoral, as altas presións estarán situadas ao oeste de Galicia. Desde aí exercerá de escudo, impedindo que os galegos vaian ás urnas cun temporal. Esa posibilidade está completamente descartada. Con todo, a súa influencia non será demasiado forte e o vento soprará do noroeste.

Unha circulación do noroeste no mes de febreiro significa, para empezar, que haberá un contraste entre o norte e o sur de Galicia. Especialmente na provincia da Coruña non se poden descartar algunhas precipitacións nun día de nubes baixas. Canto máis ao sur, o ceo estará máis despexado. Ademais, é un vento que trae aire algo máis fresco. Así que no apartado de temperaturas, cabe dicir que se agarda un ambiente propio da época do ano. As máximas oscilarán durante toda a xornada entre os dez e os trece graos como moito. En definitiva, un tempo propio de febreiro que non será escusa para non ir votar.

 Choiva e notable descenso térmico para o final de campaña 

Tal e como estaba previsto, a deste mércores foi unha xornada con temperaturas altas para a época do ano. Un corredor de ventos do sur transportou aire cálido de orixe africana ata a Galicia. Aínda que a xornada empezou con máis humidade de tipo baixo do previsto, a máxima máis alta marcouna a localidade ourensá de Leiro con 26,6 graos. A Coruña e Ferrol rexistraron 23,5. Se non fóra polas nubes matinais superouse facilmente a barreira dos 24 graos.

Este xoves agárdase un bajón térmico bastante importante, sobre todo tendo en conta as anomalías positivas que se rexistraron onte. Unha borrasca ao oeste da Península enviará unha fronte que deixará máis precipitacións na metade oeste. Durante a primeira metade do día, as choivas serán de carácter persistente, pero xa pola tarde se presentarán de xeito ocasional.

O vento soprará hoxe do suroeste e noroeste. Ambas as circulacións, sobre todo a do noroeste, provocarán que os valores diúrnos descendan nalgúns casos ata sete graos. Ourense pasará dos 24 de onte aos de 17 de hoxe. En cidades como Lugo e Ferrol agárdanse máximas de 15 graos.

O venres regresa a influencia do anticiclón a Galicia. Haberá nubes de tipo alto que non impedirán o paso do sol, aínda que o ceo estará parcialmente nubrado de oeste a este pola noite. A previsión tamén destaca a formación de néboas nas comarcas do interior e brumas nas Rías Baixas e o golfo Ártabro. As mínimas sufrirán un lixeiro descenso e as máximas non presentarán cambios significativos.

O sábado o sistema de altas presións seguirá ascendendo en latitude ata situarse sobre da Península. Unha vez máis, a súa influencia virá con ventos do sur. Será unha xornada con algo de humidade nas provincias atlánticas e con pouca nebulosidade na metade este e un lixeiro ascenso térmico en zonas do interior. O domingo, o anticiclón segue remontando e parece que podería xerar unha circulación do noroeste. Non sería un día moi inestable, pero parece probable que poidan caer algunhas precipitacións na metade norte. Ese vento provocaría, ademais, un lixeiro descenso das temperaturas.

A previsión a medio prazo para Galicia anuncia que a tregua anticiclónica durará ata o martes, cando as altas presións se retirarían ao sur, e a partir do mércores as borrascas reaparecerían.

 

 

---

---

---