Así conseguen alumnos os colexios do rural de Lugo: «Estamos pendentes de cada vez que nace un neno»
EDUCACIÓN
Os equipos directivos traballan actualmente para sumar matrículas ofrecendo máis servizos, conciliación e actividades
06 mares 2024 . Actualizado ás 15:49 h.«Dependemos moito das novas matrículas», asume a directora do CEIP de Samos , Noelia Pillado. A continuidade dos colexios públicos non está asegurada senón que, en parte, depende de que o equipo directivo sexa capaz de conseguir novas matrículas cada curso. Víveno cada ano sobre todo os centros rurais de Lugo, onde o despoboamento ás veces nin sequera trae novos bebés aos concellos. O prazo de matrícula para o 2024 está aberto e os directores están a traballar intensamente para captar alumnos: publicidade, máis servizos e actividades.
Xa desde febreiro, moitos dos colexios rurais de Lugo viven nunha xornada de portas abertas para que as familias interesadas poidan coñecer o centro. É o caso, por exemplo, do CEIP Eduardo Cela Vila de Triacastela , que a manterá durante este mes de marzo. O director, Alejandro González, explica que é esencial que o centro publicite o máximo posible todas as actividades que fan: «Aínda que algúns pais non se decidan a traer ao seu fillo finalmente, polo menos que se corra a voz».
Para atraer a novos estudantes, é vital que o colexio aumente e mellore cada anos os seus servizos e as súas actividades. No caso de Triacastela , que ten horario partido, González intenta destacar que teñen servizo de madrugadores e sumaron dúas novas actividades extraescolares: o club de lectura e un obradoiro de música. «A conciliación é básica para que os pais se queden aquí». Polo momento suman unha nova matrícula e están pendentes de tres ou catro máis.
Pola proximidade con Sarria, algunhas das familias do municipio prefiren levar aos seus fillos á capital de comarca, ante o que o centro de Triacastela ten que ofrecer mellorías para que poidan cambiar de opinión. A alcaldesa, Olga Iglesias, destaca que desde este ano hai unha Casa Neno no propio colexio, a segunda do municipio. Ademais, o Concello pedirá unha axuda para ter unha profesora de inglés e ofrece conciliación para levar aos pequenos a natación a Sarria. «En todo o que a Anpa ou o colexio nos pidan, os apoiaremos».
A implicación do goberno local e do Anpa tamén é vital para conseguir novos estudantes. No Páramo, o Concello subvenciona as actividades extraescolares, que se intentan aumentar, e o Anpa implicouse para ofrecer baloncesto. Neste centro, tamén implantaron o servizo de madrugadores para facilitar a conciliación porque algunhas das familias do municipio prefiren levar aos seus fillos á Pobra de San Xiao, como explica o director.
Tamén en Samos a directora e o Anpa están a dar un gran impulso ao colexio. Coa colaboración do Concello melloráronse as instalacións pero sobre todo ampliáronse os servizos. A directora, Noelia Pillado, destaca que hai madrugadores todos os días e extraescolares tamén todos os días, ademais de transporte e comedor como no resto de centros. «Sempre difundimos todo o que facemos para que se vexa como traballamos, intentamos ir máis alá da propia programación para ensinar outros valores,» destaca.
Do seu traballo e a súa divulgación depende , en parte, que se manteñan as clases: «Este curso por exemplo vanse catro alumanos así que temos que estar traballando todo o ano para substituir esas plazas».
«Se non hai natalidade, non hai nada que facer»
Na montaña de Lugo, como en Navia de Suarna, tamén están atentos ás novas matrículas aínda que os seus cálculos son máis fixos: «Aquí teñen que vir todos os nenos do concello porque non teñen outro ao que ir». Tan só hai posibilidade de que algúns estudantes do municipio de Cervantes ou de Ibias decántense por ir a Navia pola facilidade das comunicacións.
Polo momento, o director estima que terán unha ou dúas matrículas novas en infantil: «Aquí estamos pendentes de cando nace algún neno, xa o sabemos para contar con el». Aínda así, o colexio traballa á vez para asegurar todos os servizos ás familias, como é o comedor, o transporte ou as actividades, ademais de ser un centro plurilingüe. O municipio sufriu unha «seca demográfica» durante varios anos que se fai notar sobre todo na ESO, con só sete alumnos. Con todo, desde a pandemia houbo brotes verdes nos cursos máis baixos, sobre todo en infantil.
Desde o colexio do Páramo, que si está nunha zona onde as familias se poden decantar polos municipios limítrofes, explican que a decisión de trasladarse cada vez é menos frecuente. O director lembra que, ao final, do que principalmente dependen é de que nazan nenos: «Se non hai natalidade, non hai nada que facer».