Un tribunal alemán confirma que Mercedes implantou dispositivos de emisións non autorizados en vehículos
ECONOMÍA
Podería haber ata 2.800 afectados polo engano nos modelos diésel GLC e GLK
28 mares 2024 . Actualizado ás 15:27 h.O fabricante de automóbiles alemán Mercedes -Benz instalou dispositivos de desactivación de emisións non autorizados nos modelos diésel GLC e GLK, segundo ditaminou este xoves o Tribunal Rexional de Stuttgart ante unha demanda colectiva de consumidores.
Prodúcese así un novo episodio do escándalo das emisións nos motores diésel coñecido como «dieselgate», neste caso por unha demanda presentada fai tres anos pola Federación Alemá de Organizacións de Consumidores (VZBV), que estima que podería haber ata 2.800 persoas afectadas, segundo informan as axencias internacionais Dpa e Bloomberg.
A Autoridade Federal de Transporte Motorizado (KBA) xa advertiu que Mercedes instalara dispositivos de desactivación non autorizados nestes vehículos, restrinxindo así a purificación dos gases de escape, algo que a compaña negou no seu momento.
O caso de Mercedes é similar a un que protagonizou a organización de consumidores alemá VZBV contra Volkswagen no 2020, que rematou nun acordo de 830 millóns de euros entre a marca e os consumidores.
Sen indemnizacións directas
No entanto, o tribunal admitiu de xeito parcial a demanda contra Mercedes e a marca xa adiantou a súa intención de recorrer o fallo, xa que ten un punto de vista xurídico «diferente ao do tribunal», e cre que as demandas son infundadas, polo que se defenderán delas.
Segundo sinala Bloomberg, os condutores afectados non recibirán indemnizacións de xeito directo polo fallo, senón que terán que demandar á marca de xeito individual e agardar a que a xustiza se pronuncie polo recurso que presentará Mercedes .