BBVA desembarca en Miami para captar clientes entre as grandes fortunas latinoamericanas

O Grupo BBVA abriu unha nova entidade, BBVA Global Wealth Advisors, en Miami co obxectivo de prestar servizo de asesoría de investimentos aos clientes latinoamericanos con altos patrimonios. BBVA Global Wealth Advisors súmase á oferta internacional de xestión de patrimonios que xa ofrece BBVA en Suíza e en España. Este servizo, nesta primeira etapa, ofrecerase principalmente aos clientes latinoamericanos que non residan nos Estados Unidos e interesados en dispor dunha solución de asesoría de investimento internacional no país norteamericano, con activos baixo xestión de máis de 500.000 dólares (458.632 millóns de euros).

Os clientes de BBVA Global Wealth Advisors terán acceso, entre outros, aos servizos de xestión non discrecional de carteiras e a contas de asesoría ou contas con tarifa integral de comisións. O director de BBVA Asset Management & Global Wealth, Jaime Lázaro, sinalou que a apertura desta oficina permitiralles avanzar na integración das capacidades locais e globais da xestión de patrimonios de BBVA para «unha mellor proposta de valor» aos seus clientes latinoamericanos. Pola súa banda, o director de BBVA Global Wealth Advisors, Murat Kalkan, destacou que establecer o seu propio servizo de asesoramento de investimentos con sede nos Estados Unidos para os clientes de alto patrimonio é un compoñente fundamental da proposta de valor no seu servizo a estes clientes. «O lanzamento deste servizo no mercado de xestión patrimonial máis grande do mundo permitiranos complementar fortemente a oferta xeral do grupo neste espazo e abordar unha necesidade altamente demandada polos nosos clientes en varias das xeografías nas que estamos presentes», apuntou. BBVA Asset Management & Global Wealth é a unidade que coordina as xestoras de activos, asesorías de investimentos e as bancas privadas do Grupo BBVA a nivel global.

---

---

---