O PIB de Galicia avanzou un 1,8% no 2023, encadeando tres anos de crecemento
ECONOMÍA
Os postos de traballo aumentaron en case 20.000
23 feb 2024 . Actualizado ás 12:25 h.A economía galega creceu no ano 2023 un 1,8%, segundo os datos publicados polo Instituto Galego de Estatística (IGE) este venres. O aumento do produto interior bruto (PIB) está por baixo do avance do 2,5% de España -segundo datos do Instituto Nacional de Estatística (INE) publicados a finais de xaneiro-.
Deste xeito, o PIB de Galicia encadea tres anos consecutivos de crecemento despois de 2020, ano no que houbo unha acusada baixada debido ao impacto da pandemia.
O IGE indica tamén que o PIB aumentou un 1,8% no último trimestre do 2023 respecto ao mesmo período do 2022, mentres que a taxa aumentou un 0,8% en comparación cos tres meses anteriores.
Nun comunicado, a Consellería de Facenda explica que se cumpre a revisión á alza das previsións macroeconómicas feita polo Goberno galego o pasado mes de outubro, proba do realismo e a prudencia nas estimacións dos orzamentos autonómicos».
Desde o punto de vista da demanda, no ano 2023, a externa achegou un punto porcentual, cun crecemento do 1,5% das exportacións, mentres a demanda interna achegou 0,8 puntos. no que se refire á oferta, o sector da industria creceu un 2,5%; e os servizos aumentaron un 2,3%, cun maior incremento no apartado de comercio, transporte e hostalería (4,3%).
No conxunto do ano 2023, os postos de traballo equivalentes a tempo completo subiron un 2% en Galicia, o que supón un incremento de 19.989 postos respecto ao ano anterior.