A compaña tiña previsto o seu despregamento nos municipios de Brión, Noia, Lousame e Rois
13 feb 2024 . Actualizado ás 15:29 h.O Ministerio para a Transición Ecolóxica arquivou o proxecto do parque eólico Furacán que Greenalia tiña previsto despregar nos municipios coruñeses de Brión, Noia, Lousame e Rois.
O Boletín Oficial do Estado (BOE) publica este martes a resolución adoptada o pasado 1 de febreiro polo que a Dirección Xeral de Política Enerxética e minas desestima a solicitude da compaña para recibir a autorización administrativa e a declaración do proxecto de utilidade pública. O parque en cuestión ía contar cunha potencia de instalada de 56 megawatts (MW).
Greenalia aínda non esgotou a vía administrativa. Disporá do prazo dun mes para presentar un recurso de alzada ante a secretaria de Estado de Enerxía, Sara Aagesen.
Segundo os feitos descritos, a empresa solicitou o 17 de setembro do 2020 a autorización do parque eólico. Unha vez admitida a trámite, procedeuse á avaliación de impacto ambiental. O inicio demorouse ata o 31 de marzo do 2022. A Dirección Xeral de Calidade e Avaliación Ambiental emitiu o 18 de xaneiro do 2023 unha resolución na que asegurou non contar «con elementos de xuízo suficientes para formular unha declaración de impacto ambiental», procedendo ao arquivo do expediente.
O proxecto, que obtivera permisos de accesos á rede de transporte de electricidade, viu revogada esa autorización o 15 de xuño do 2023, cando Rede Eléctrica de España (REE) comunicou ao Ministerio que eses permisos de acceso e conexión do parque Furacán caducaran. Excedeuse o tempo legal para obter unha DIA favorable.
«Inactividade» das Administracións Públicas
Greenalia presentou as súas alegacións o 13 de novembro do 2023 nas que lembrou que o 28 de febreiro dese mesmo ano interpuxera un recurso contra a decisión de arquivar o parque por considerar que era contraria a Dereito. E aínda estaba pendente de resolución. Ademais, a promotora responsabilizou á Administración de non chegar a tempo cos permisos: «O incumprimento do fito administrativo débese á inactividade das Administracións Públicas, que impediu continuar adiante co proxecto e, polo tanto, a unha causa non imputable de ningún xeito á Sociedade».
Entre estudos, rexeitamentos administrativos e recursos, xa se excedeu o tempo legal e iso fixo que o parque perdese finalmente a súa conexión á rede.