A patronal galega confía na creación de 15.000 empregos na comunidade no próximo ano
ECONOMÍA
Mostra o seu temor pola escaseza de man de obra e a desaceleración da actividade económica
16 dic 2023 . Actualizado ás 05:00 h.O presidente da Confederación de Empresarios de Galicia, Juan Manuel Vieites, expresou onte un «cauto optimismo ante o 2024», pola posible redución de tipos de interese dun 0,25 %, por unha agardada «aterraxe suave do PIB» e pola contención da inflación. Pero alén da balanza situou un absentismo laboral «insostible», que rexistra no 2023 unha taxa do 7,1 % en Galicia (a segunda máis alta de España e un punto por amais da media estatal), polo que demandou medidas como un reforzo da actuación das mutuas e inspección de Traballo. Expuxo a escaseza de man de obra ligada ao reto demográfico, destacando que Galicia perdeu 93.705 habitantes desde o 2008. E mostrou a «gran preocupación no sector empresarial ante a desaceleración da actividade económica e os incrementos dos custos laborais, financeiros e de produción, o cal supón un risco para o mercado de traballo e a economía en xeral». No entanto, espera que poidan crearse máis de 15.000 postos de traballo en Galicia, sempre que se materialicen proxectos estratéxicos para a comunidade.
Vieites considera esencial impulsar a actividade económica, o crecemento e a xeración sostida de emprego «e evitar medidas que introduzan rixideces e custos adicionais». Falou de que a alza do Salario Mínimo Interprofesional «un 47 % no último lustro e a redución de xornada supoñen un incremento de custos empresariais e unha afectación grave ao sistema de relacións laborais no noso país», provocando fortes distorsiones en sectores como o agrícola, e disfuncións na competitividade co norte de Portugal . Entende que a alza do SMI debe trasladarse aos contratos do sector público, que han de garantir os prezos de mercado, dixo.
O presidente da patronal galega destacou que o empresariado necesita estabilidade política, xa que a actividade económica non debe verse condicionada por procesos electorais, e sinalou: «Agardemos que o galego vote con responsabilidade» para propiciar un goberno estable, un executivo que agarda sexa «amigable co mundo empresarial». A CEG solicitou reunións nas próximas semanas cos líderes dos partidos con representación parlamentaria en Galicia para trasladarlles as súas demandas e coñecer os seus programas de primeira man.