Reganosa confía en que o fallo do Supremo non afecte á súa actividade nin ao seu plan de futuro
ECONOMÍA
Aínda que o ordenamento de Mugardos non permitía as actividades de gas, a empresa sostén que si se autorizaba o almacenamento de todo tipo de hidrocarburos
06 abr 2016 . Actualizado ás 05:00 h.«Agardo que o fallo non afecte á nosa actividade e que a tramitación se resolva coa maior celeridade posible, xa que o único vicio atopado polo Tribunal Supremo xa está emendado». O que así se expresa é o director xeral de Reganosa , Emilio Bruquetas, quen insiste en que, aínda que o alto tribunal sostén que cando se concedeu a autorización á terminal, no 2002, o ordenamento urbanístico de Mugardos non permitía as actividades de gas -e por iso ditou unha sentenza na que anula a súa autorización administrativa-, o plan si autorizaba o almacenamento de todo tipo de hidrocarburos.
No entanto, a empresa traballa xa na solicitude dun novo permiso. Tamén subliña a validación dos trámites en materia de seguridade e medio ambiente que realizou a firma e que o Supremo admite que o problema urbanístico xa se solucionou, polo que haberá de ser tido en conta cando se tramite a nova autorización.
Tamén o alcalde de Mugardos , Juan de Deus (PP), insistiu en que o plan ao que alude o fallo xa está regularizado e contén as modificacións esixidas.