A choiva arrefriou as vendas e chegando ao ecuador, moitos xa estudan descontos
04 may 2018 . Actualizado ás 05:00 h.O sol luciu onte con forza na zona e farao os próximos días, pero segundo as previsións meteorolóxicas, a choiva volverá caer a semana que vén, aínda que cos termómetros afectados dalgún que outro subidón que igual non nos permite deixar en casa o paraugas, pero si gardar os abrigos. Ao ceo seguen mirando os comerciantes, que a estas alturas e xa máis que no ecuador da tempada non ven o horizonte nada claro.
O comercio xógalla ao sol tamén esta fin de semana. A celebración do Día da Nai e a primavera adoita ser unha boa combinación para incentivar as vendas, pero este ano, o frío e a choiva dos últimos días fixo que a clientela non enchese nin moito menos as tendas e, o que máis e o que menos se queixa das vendas. Algún apunta que «antes a semana do Día dá Nai había colas para mercar, agora, nada». Nunha tenda de Lalín a súa propietaria comentaba onte que «á crise pódeslle facer fronte porque sempre podes ir a provedores con roupa máis barata e máis ou menos seguir vendendo, pero contra o tempo non hai nada que facer».
E é que os comerciantes recoñecen que custa cambiar a mentalidade dos clientes. Eses que consideran que do 15 de agosto para adiante xa non queda verán e os que co tempo das últimas semanas non se animaban a levar pezas de manga longa ou roupa algo máis de abrigo porque igual «en quince días chega ou verán» e aos que tampouco lles convencía adquirir pezas de manga curta ou de sisas «porque con este tempo non ou vou poñer». O caso é que por unha banda e por outro o resultado era o mesmo: vendas escasas. Aínda que nisto da vendas, as queixas van por barrios. Co ceo revolto e como agasallo para o Día da Nai hai quen opta polos complementos que son máis todo tempo. Unha xoia, máis ou menos cara, os perfumes ou outros produtos de perfumería ou droguería, xunto coas eternas e clásicas flores incrementan as vendas nestes días.
Se as vendas no que a roupa e calzado estival refírese fraquean na versión home ou muller, na moda infantil, a situación é diferentes aínda que de momento, o que máis se vende son pezas desas que se poñen case todo o ano. Unha lista que suma sobre todo cazadoras, suadoiros e pantalóns.
Aos comerciantes preocúpalles as poucas vendas realizadas de momento, sobre todo porque en xuño e xa a partir da Noite Branca, entran en período descontos e rebaixas. Unha redución de prezos que algúns xa están a pensar en facer seguindo o ronsel das grandes superficies e das cidades. Porque como explicaba algún comerciante, «a mercancía hai que pagala e sacar cartos para mercar a da próxima tempada».
O peor non é que a tempada primavera-verán estea a deixar moito que desexar. O problema é tamén que chega despois doutra mala. Os comerciantes achácano a «un tempo ao revés». E é que se no outono-inverno non se vendían pezas era porque a calor do verán perseguiunos ata case decembro e cando legou o frío os comercios xa venderon con descontos coas rebaixas ás portas. E agora pasa o mesmo pero ao revés. Os comercios están cheos de roupa estival e o ceo empéñase en debuxarnos días grises, fríos e con choiva en abundancia. Os poucos días de sol, din, saldáronse con boas vendas. Agardemos que esta fin# de semana se repitan.
Comuñóns e cerimonias axudan a facer caixa
Pero non todo van ser malas noticias. A primavera e o verán son tempo de primeiras comuñóns e cerimonias. Un calendario de eventos que axuda a facer caixa aos comercios.
E xa non son só os vestidos dos nenos, de noivas e noivos. Á lista hai que sumar os irmáns, as madriñas e padriños, os traxes dos invitados, os tocados, os adornos, os zapatos. Un suma e segue do que poucos se libran. Unhas vendas que se adoitan levar a cabo con meses de antelación.
Facilidades para las compras por el Día de la Madre y aprovechando la Festa do Orgullo
O Centro Comercial Aberto (CCA) de Lalín puxo en marcha unha campaña que ten como obxectivo incentivar as vendas nesta fin de semana ao fío da celebración do Día da Nai, pero tamén aproveitando as sinerxías creadas polos actos da Festa do Orgullo programados. O obxectivo é que os veciños compren e que os que visiten Lalín aproveiten para coñecer o comercio local. O CCA recomendou aos seus socios prolongar a apertura do comercio hoxe ata as 23.00 horas. Algúns establecementos aproveitan para ofrecer descontos ou algún extra aos seus clientes. É o caso de C&C Young Trend, que fará un 20 % de desconto hoxe e mañá e entre os billetes de compra dos dous días sortea tres entradas ao parque Warner Bross de Madrid cunha noite de aloxamento e almorzo para gozar dunha fin de semana en familia.