David Páez afirmou que o triunfo ante o Rápido dá un «plus anímico» ao persoal para as últimas tres xornadas
30 abr 2024 . Actualizado ás 05:00 h.Ao Estradense quedan tres partidos para rematar a liga e confirmar a súa presenza en Terceira División para a celebración do centenario a próxima tempada. A vitoria ante o Rápido de Bouzas cambiou lixeiramente o sentido da clasificación, pero supuxo un golpe amais da mesa para os rojillos, capaces de romper unha serie de tres derrotas seguidas ante un rival directo. O seu adestrador, David Páez, destacou o impacto emocional desta vitoria, que a pesar de chegar nas postrimerías do partido, supuxo a culminación dun gran traballo.
«Foi unha vitoria moi traballada. O gol chega no 90, pero mereciámolo antes. O fútbol foi xuto, mereciamos este premio. Podemos estar orgullosos», indicou. «Estou moi contento porque viñamos dunha dinámica de partidos sen sumar e isto ten que darnos un plus anímico e motivacional para encarar os partidos que quedan», continuou.
Páez contrapuxo o nivel do sábado con partidos como os do Arteixo ou o Somozas onde «o equipo non competiu ben». Eloxiou o bo traballo na presión para evitar o xogo directo dos vigueses, así como a precisión nas transicións ofensivas. «Sairon moi mentalizados, dende o primeiro minuto en campo rival apretando e axustando ben. Non é fácil defender o seu xogo directo, os centrais estiveron moi ben, tamén os laterais e os mediocentros axudaron moito», asegurou.
Goles que valen puntos
O heroe foi Juanín. O atacante rojillo sumou a súa sétima diana da campaña para dar osíxeno a un Estradense que segue durmindo a tres do descenso, aínda que coa gol average a favor. Os seus goles valeron oito puntos para o equipo, a maioría craves para puntuar. Sen os tantos de Juanín o Estradense estaría en descenso. Á marxe das súas dianas fronte ao Rápido na primeira volta (0-3) e ante a UD Ourense, xa que foi o que abriu a lata (1-1), o resto de goles evitaron derrotas ou empates.
Os dous tantos contra o Viveiro no Municipal permitiron rabuñar un punto. Contra o Arousa tamén anotou o gol que salvou o empate para o Estradense. Fronte ao Pontevedra B marcou o da vitoria, do mesmo xeito que o sábado ante o Rápido, o que equivale a seis puntos con dous remates á rede.