A Super Bowl é o máximo expoñente dun deporte en claro crecemento en Galicia e que agora se atopa á espera dun recoñecemento oficial por parte da Xunta. Existe unha Liga autonómica co San Francisco de Teo, o Santiago Black Ravens, o Trasnos CFA de Fene, o Oviedo Mad Bulls e o Towers Football de Oleiros. En España a expansión é similar. A Super Bowl contribúe a que ademais dunha pura actividade deportiva, o fútbol americano adquira a condición de acción social. Nós reunirémonos no Hándicap Café (Rúa Salgado Somoza, A Coruña) desde a medianoite do domingo para vela. Moitos de nós iniciámonos neste deporte grazas á NFL. Ademais, funciona como un evento de captación porque acabas debullando o xogo e hai xente que se engancha desde ese momento. Nos Estados Unidos, todo isto se magnifica. A Super Bowl celébrase durante unha semana con múltiples actividades nas que o partido é a guinda. Internet contribúe moitísimo á propagación e goce dun deporte e dunha xornada que os estadounidenses marcan no calendario como data clave para organizar unha reunión de amigos. Sin duda, a gran forza da Super Bowl.
David Rodríguez Antuña é presidente da Asociación Galega de Fútbol Americano