Medio centenar de estudantes e docentes do Centro de FP Afundación da Coruña retiran unha tonelada de especies invasoras na Torre
A Coruña CIDADE
Desde o ano 2017 recolléronse xa máis de 62 toneladas de uña de gato na contorna do faro
21 feb 2024 . Actualizado ás 17:41 h.O programa de voluntariado ambiental de Afundación e Abanca, Traballando pola mellora do patrimonio natural, reuniu na mañá deste mércores a máis de 50 persoas, principalmente estudantes e docentes do centro de formación profesional Afundación para realizar labores de retirada de especies botánicas exóticas invasoras na contorna da torre de Hércules.
A actividade, organizada en colaboración co Grupo Naturalista Hábitat e o Concello da Coruña, tiña como obxectivo fundamental controlar a presenza de exemplares de Carpobrotus edulis (coñecida popularmente como uña de gato) nunha zona de importante valor ecolóxico, declarada como Espazo Natural de Interese Local (ENIL).
As persoas participantes retiraron en total unha tonelada desta especie exótica invasora surafricana orixinaria da rexión do Cabo. A Carpobrotus edulis, que chegou a través da xardinería e ten unha gran capacidade enraizante, adoita ocupar medios costeiros, formando un tapiz sobre o substrato que altera as condicións do chan, principalmente insolación e dispoñibilidade de nutrientes, explican.
O voluntariado da Obra Social de Abanca colabora co control desta especie exótica invasora na contorna da Torre desde o 2017, dentro do proxecto desenvolvido polo grupo Naturalista Hábitat e o Concello. Co recolleito este mércores, en total retiráronse xa máis de 62 toneladas de uña de gato.
Xunto aos labores de limpeza e retirada de especies invasoras, as persoas participantes recibiron información sobre este enclave e sobre boas prácticas para contribuír así á súa posta en valor e conservación da súa riqueza natural, como parte dos obxectivos deste programa que buscan non só recuperar a contorna, senón tamén contribuír a estender na sociedade unha conciencia sostible.