Conseguir unha entrada hase convertido nun labirinto que supón abrir unha conta nunha determinada entidade bancaria
01 dic 2023 . Actualizado ás 05:00 h.Leo perplexo esa idea de que planea no ambiente de que na Coruña non poidas tomarche un café nunha terraza para así fomentar calquera outro tipo de consumición máis cara. Tropézome con iso pouco despois de ver que nese labirinto no que se converteu conseguir unha entrada para un concerto resulta que hai que abrir unha conta nunha entidade bancaria para poder optar á preventa (¡ollo, á preventa!) do mesma na nosa cidade. E todo iso coincide despois de volver dunha viaxe a Nova York onde, entre prezos dinámicos (e disparatados) para todo (cedendo os teus datos a sabe Divos que cousas), arrepiado vin como a urbe evolucionara a unha sorte de distopía ultracapitalista na que, por exemplo, moitos dos locais de hostalería xa non tiñan baño e os que o tiñan non deixaban usalo a un neno ata que mostrase un billete de que consumira (despois de agardar unha cola inmensa para un café de 5 dólares nun vaso de cartón). Cando tomei o avión de volta, na miña cabeza estaba a idea da miña querida cidade, na que non temos o Empire State nin os Knicks, pero si a torre de Hércules, o Dépor e, sobre todo, a cálida sensación de ser algo máis que unha engrenaxe nunha maquinaria destinada a sacarche diñeiro e máis diñeiro. Comentábao coa encargada do meu bar habitual nada máis chegar e superar o jet lag, gozando dunha cana, uns sorrisos e unha calidez ausente alén do Atlántico. Pero, no fondo, a mosca que un ten tras a orella vénlle a dicir que, tarde ou cedo, remataremos en algo parecido. Con que, por exemplo, un remate nunha terraza pedindo un cubalibre para facer unha preventa dunha entrada, que se confirmará nun segundo paso, parece ser un bo punto de partida para chegar a ese destino.