Abegondo impulsa unha demanda dos municipios afectados, pero a Deputación coruñesa anunciou que reclamará de oficio o 100 % da taxa aos concellos que teñen delegada a xestión tributaria
23 ene 2024 . Actualizado ás 20:22 h.Abegondo impulsou este martes unha reunión cos 33 concellos afectados o paso da AP-9 para establecer unha estratexia conxunta para reclamar á concesionaria da autoestrada que abone todo o IBI, ante a caducidade, o pasado agosto, da bonificación do 95 % que gozaron desde 1972 grazas á lei de autoestradas. Aínda que están pendentes de contabilizar pormenorizadamente canto lles correspondería a cada un, poderían pasar a cobrar en conxunto uns 7 millóns de euros anuais.
O rexedor de Abegondo, José Antonio Santiso, estimou razoable a súa demanda e dixo que «vai sendo moita hora de reclamar algo histórico despois de 50 anos». Expuxo o que supón a afección desta vía, no seu municipio de 20 quilómetros sen dar servizo directo aos veciños porque non dispoñen de acceso e á que ata o momento só lle podían cobrar o 5 % do IBI. «Deben pagar como calquera outra infraestrutura», considerou Santiso. A modo de exemplo, expuxo que un concello como Caldas, un dos presentes no encontro, podería pasar a recibir 300.000 euros fronte aos 15.000 euros actuais.
Esta nova demanda por este tema reactivouse por parte de Abegondo cando coñeceron en decembro a vitoria lograda por varios municipios de León para recadar o 100 % do IBI da autoestrada AP-66.
Á reunión asistiron representantes de Gonzalo Avogados, un despacho madrileño especialista en demandas sobre os considerados como bens inmobles especiais (BICE) no que se inclúen as autoestradas, que explicaron os antecedentes xudiciais que levan a esta situación e incidiron que a concesión está finalizada e por iso agora pódese reclamar ese beneficio tributario. Javier Gonzalo expresou que aínda que no 2017 xa iniciaron xestións para denunciar o status da AP-9, resultaron infrutuosas, do mesmo xeito que a realizadas no seu día por varias deputacións.
«Tocouvos a lotería», expresou José María Simón, tamén deste despacho, respecto ao futuro que aventurou para os concellos afectados pola AP-9, pero do mesmo xeito que os seus compañeiros precisou que a reclamación debería ser a través dun ditame xurídico e unha argumentación precisa.
Aínda que desde este despacho se mostraron dispostos a levar a cabo esta reclamación, a Deputación coruñesa, que ten delegada a función tributaria de 18 dos 20 concellos afectados pola AP-9 na Coruña (fóra das dúas cidades) precisaron horas despois deste encontro que xa ten previsto liquidar este ano a Audasa o 100 % do IBI. Ao seu entender, o real decreto que establece o fin da bonificación así o ampara.
A estimación que realiza a entidade provincial é que a recadación por este concepto destes 18 municipios pasará dos 175.000 euros a 3,7 millóns. O deputado responsable da área de Facenda, José Ramón Rioboo, precisou que os servizos tributarios da Deputación coruñesa «xa teñen contemplado liquidar este ano o 100 % do IBI a Audasa» de oficio. Desde Abegondo, precisouse que están encantados con que a iniciativa servise para lograr tamén a unión da Deputación a unha proposta apoiada por concellos de distintas cores políticas.