Formoso pide á Xunta un esforzo equitativo nos municipios galegos
26 abr 2024 . Actualizado ás 05:00 h.O Plan Único da Deputación Provincial da Coruña superará en abril os 100 millóns de euros, unha cifra marca que se destinará a financiar obras, gastos correntes, servizos públicos e iniciativas sociais nos 93 municipios da provincia durante este ano.
O presidente da Deputación da Coruña, Valentín González Formoso; o vicepresidente, Xosé Regueira Varela, e a deputada de Plans Provinciais e Asistencia aos Municipios, Cristina García Rey , presentaron onte as novidades do POS+2024 que suma aos 50,5 millóns de euros que xa se incluíron no orzamento inicial do 2024, outros 50 millóns de euros que se aprobarán no pleno de hoxe no marco dun expediente de modificación de créditos.
Formoso destacou «o cambio revolucionario» que supuxo o Plan Único na forma de facer política, xa que multiplicou por tres o investimento da Deputación nos concellos e deulles «total autonomía» á hora de decidir en que invisten os fondos.
«Xa non hai plans de piscinas ou de campos de fútbol de herba artificial que obrigaban aos concellos a facer estas infraestruturas, as necesitaran ou non, ou a perder os fondos. Hoxe os concellos da provincia poden decidir a que destinan os seus recursos da Deputación», afirmou Valentín González Formoso.
«Desde a súa creación no 2017, o Plan Único supuxo máis de 718 millóns de investimento nos concellos, máis de 4.000 obras e miles de servizos básicos que melloran a calidade de vida da cidadanía nos 93 concellos da provincia», afirmou o presidente provincial, para quen o plan é «un gran axente dinamizador da economía, que supuxo o mantemento de máis de 13.000 empregos na provincia».
González Formoso contrapuxo este modelo co da Xunta, lembrando que «para todos os concellos de Galicia, o Goberno autonómico destina 113 millóns de euros a través do Fondo de Cooperación Local, que leva conxelado unha década, mentres que a Deputación inviste máis de 100 millóns de euros só nos concellos da provincia da Coruña».
«Queremos falar disto no momento en que tanto se fala de financiamento autonómico, pero non se fala de abordar o reto do apoio aos concellos», engadiu antes de reclamar á Xunta «que dote dun financiamento adecuado aos municipios para garantir a prestación dos servizos públicos, moitos deles competencias autonómicas que son derivadas aos concellos sen dotalos de recursos económicos».
Pola súa banda, o vicepresidente, Xosé Regueira, secundou que se trata dun «plan revolucionario» que permite financiar «a maioría da obra pública dos concellos». Cristina García Rey sinalou que «a mellor parte vén cando estes cadros cheos de cifras se converten en realidades».