Oleiros e Culleredo piden cambios na pegada sonora de Alvedro publicada no BOE
A Coruña
O primeiro estudará o documento con técnicos especialistas e o segundo ten un recurso aberto na Audiencia Nacional
22 abr 2024 . Actualizado ás 19:48 h.O Ministerio de Transportes e Mobilidade publicou no Boletín Oficial do Estado o Real Decreto polo que se aproban as servidumes aeronáuticas acústicas, o mapa de ruído e o plan de acción do aeroporto de Alvedro que afecta a 53 hectáreas de chan de Oleiros , especialmente en Montrove e O Seixal.
O Concello contratará servizos técnicos especiais para analizar o documento, «que supón máis restricións urbanísticas nos solos afectados». O goberno local e centos de persoas xa presentaran alegacións contra a ampliación da pegada sonora, e aseguran que non foron atendidas nin contestadas o ministerio.
Pola súa banda, o Concello de Culleredo sinalou que ditas servidumes e zonas afectadas son as mesmas que se incluíron no Plan Director, validado polo Estado no 2022, contra o que o Concello mantén un recurso na Sala do Contencioso-Administrativo da Audiencia Nacional, co que busca exercer a defensa dos intereses veciñais do seu territorio. «Promoveremos reunións con asociacións e colectivos interesados para recibir información didáctica e técnica sobre a situación dos procedementos», indican fontes municipais de Culleredo.