Alfonso Villares (PP) e Daniel Castro (BNG) estarán no Parlamento, mentres que Mayra García (PSOE) quedará fóra; consulte aquí todos os resultados por municipios
18 feb 2024 . Actualizado ás 23:43 h.A alta participación en base aos datos das 17.00 horas (seis puntos por amais da rexistrada á mesma hora nas autonómicas do 2020) fixo crer a moitos que este 18 de febreiro había posibilidades de cambio na Xunta, pero o escrutinio consolidou a maioría absoluta do PP, con Alfonso Rueda á fronte, na que será a duodécima lexislatura do Parlamento de Galicia. Tamén na Mariña, onde, con preto do 90% do voto escrutado, os populares venceron con folgura nos 15 municipios. O Bloque Nacionalista Galego (BNG) consolídase como segunda forza na comarca, ao lograr esa posición en 11 concellos: O Vicedo, Viveiro, Xove, Cervo, Foz, Lourenzá, Barreiros, Ribadeo, Burela, Mondoñedo e O Valadouro. Mentres tanto, o PSdeG-PSOE acadou o segundo posto en catro concellos: Ourol, Alfoz, A Pontenova e Trabada.
CONSULTE AQUÍ TODOS Os RESULTADOS
A xornada electoral transcorreu sen incidencias de gravidade, como confirmaron desde a Xunta Electoral de Mondoñedo pasadas as oito da tarde, minutos despois do peche de todos os colexios e mesas electorais. Rechamante foi o ocorrido na mesa emprazada na antiga escola de Chavín, en Viveiro, que funcionou cos segundos suplentes (presidente e dous vogais) tras a incomparecencia dos cidadáns que foran designados como titulares e como primeiros suplentes.
En canto á representación da comarca, continuará no Parlamento galego a mindoniense Elena Candia López, exalcaldesa de Mondoñedo e expresidenta da Deputación, e que concorreu aos comicios autonómicos encabezando a lista do Partido Popular por Lugo. Na anterior lexislatura foi vicepresidenta do Parlamento. Acompañaraa Alfonso Villares Bermúdez, que se estreará como deputado tras ter abandonado a alcaldía de Cervo para asumir a titularidade da Consellería do Mar. «A mobilización sentíamola na nosa xente. Non houbo nada especial para que houbera un cambio de goberno. Galicia estaba funcionando e temos un presidente que é un gran valor. O éxito del e das súas accións é o reflexo do que aconteceu nas eleccións. Galicia está funcionando e fixemos unha campaña na que presentamos moitas propostas», manifestou Villares a La Voz pasadas as dez da noite, cando o escrutinio encaraba xa a recta final.
Tamén regresará ao Parlamento galego outro mariñán, o veterano José Manuel Balseiro Orol, que accedeu por primeira vez ao Parlamento no 2005.
A Mariña tamén terá un representante do Bloque Nacionalista Galego, a través do ribadense Daniel Castro García, que foi de número 2 da candidatura, do mesmo xeito que xa fixera nas autonómicas do 2020, cando foi elixido deputado. «O BNG fai historia cos mellores resultados da súa historia, e desde mañá [polo luns] volveremos traballar para gobernar este país. As eleccións demostraron que seguimos sendo a alternativa e que a xente confía en nós. Vémonos dentro de catro anos!», manifestou Castro a La Voz desde Santiago este domingo pola noite.
Quen finalmente non accederá ao Parlamento é a socialista Mayra García Bermúdez, que deixou a Alcaldía de Trabada para presentarse a estes comicios como número 3 do seu partido por Lugo. «Traballamos para que a maioría social progresista de Galicia poidera optar a un cambio na Xunta. Non foi posible. Seguiremos traballando desde a oposición para mellorar a vida dos galegos e galegas. Gustaríanos que o resultado fose outro, pero os cidadáns mandan e só cabe seguir traballando», afirmou a secretaria xeral do PSOE en Trabada, onde os socialistas melloraron os resultados do 2020. Si estará no Hórreo Lara Méndez, natural de Cervo e que deixou a Alcaldía de Lugo para ir como número 2 na candidatura do PSOE encabezada por Xosé Ramón Gómez Besteiro.