O Colón acolleu os concertos de agrupacións da OSG
07 ene 2024 . Actualizado ás 05:00 h.Son Futuro (iniciativa pedagóxica da OSG) presentou os progresos dalgunhas das súas agrupacións en dous concertos no Colón. O primeiro, cos coros Infantil (agora ao mando de Sofía Rodríguez) e Novo (que dirixe Daniel G. Artés), e o segundo coas orquestras infantís (dirixidas por Enrique Iglesias e Jorge Montes).
Nin rastro da Orquestra Nova, o maior acerto de Son Futuro; que non terá encontro de Ano Novo como non tivo encontro estival. Unha mágoa, porque para manter a calidade e o prestixio é vital garantir unha continuidade.
No concerto dos coros (que deberían ser ponte cara ao coro adulto) o infantil abordou música popular. Fan un esforzo indubidable, gozan e son aptos para este repertorio; pero é difícil imaxinalos en retos sinfónicos de enxunlla (como as sinfonías 3 e 8 de Mahler, que fixeron moi ben anos atrás): o seu alcance hoxe é outro. En polifonía de corte máis clásico, mellor o Coro Novo por empaquetado e empaste, coas cordas femininas máis presentes que as masculinas. Agora mesmo ambos os conxuntos parecen máis proxectos divulgativos que pasos previos ao coro de adultos. Para reflexionar.
As dúas orquestras infantís de corda sosteñen un proxecto moi serio e coherente, con lóxica interna. Con alumnos de ata 15 anos, os grupos Pizzicato (cos máis novos) e Arcos (cos máis maiores) expuxeron programas con sentido (centrados en música barroca, de la suite imaxinaria que expuxeron os máis pequenos ao Concerto grosso de Haendel que ofreceron os máis maiores) con resultados notables por empaste, redondez do son e sentido dos tempi. Este proxecto mira ao futuro: aplauso aos seus responsables e aos seus integrantes. Así se fan as cousas.
Os concertos contaron con chiscadelas do Nadal e fixeron as delicias do público. Cabe revisar a meta real destas iniciativas tal e como están expostas a día de hoxe; e asegurarse de que os proxectos teñan continuidade e coherencia pedagóxica. E, ante todo, oxalá que a Orquestra Nova se retome canto antes.