O trío leonés actuará o domingo 27 ás 22.00 horas na chaira do centro cívico
18 ago 2023 . Actualizado ás 14:40 h.Café Quijano será o prato forte das festas de Novo Mesoiro da próxima fin de semana. O trío leonés actuará ás 22.00 horas na chaira do centro cívico e repasará os seus 25 anos de carreira. Os festexos celebraranse entre o 25 e o 27 de agosto e contarán con actividades para todas as idades. A maioría dos actos terán lugar na zona do parque infantil, como en anos anteriores, e, en caso de choiva, as actividades trasladaranse ao centro cívico.
O venres 25 a partir das 20.00 horas está programado o espectáculo Isto é Rock, no que se fará un repaso polas grandes historias e lendas do xénero. Ás 22.00 horas terá lugar a actuación da banda coruñesa Doutor Snob.
O sábado haberá unha actuación dentro do programa Cascarillarte a cargo de Máximo Óptimo a partir das 12.30 horas. A sesión vermú arrincará ás 14.00 horas co Dúo Karamba e ás 22.00 será o momento da orquestra Triunfo.
A xornada dominical arrinca ás 14.00 horas coa banda Virtual Project. Pola tarde, Bandullo Azul representará Fazula e O Ladrón de Paraugas a partir das 19.30 horas dentro do Cascarillarte.