Cirurxía Vascular crea a primeira unidade de Galicia especializada en pé diabético. O obxectivo, reducir ata un 80% a perda de membros
06 jul 2015 . Actualizado á 05:00 h.O servizo de cirurxía vascular do Chuac, que atende unha área de 700.000 persoas porque tamén cobre Ferrol, está a pór en marcha a primeira unidade de pé diabético de Galicia. O obxectivo está claro tanto para o xefe de servizo, o doutor Caeiro, como para as profesionais de enfermería sobre as que recae o importante traballo a desenvolver: evitar as amputacións derivadas das complicacións que provoca a enfermidade. Son aínda moitas as que se rexistran cada ano no centro coruñés, posto que ademais das ao redor de 80 parciais de pé que se ven obrigados a practicar cada ano, outras noventa persoas sofren as denominadas amputacións maiores da perna, por amais ou por baixo do xeonllo.
Potenciar, como se está facendo, o número de cirurxías reparadoras e impulsar iniciativas como a nova unidade levan a Caeiro a declararse «optimista cos resultados: nun futuro próximo poderemos ver como diminúe este número de amputacións e melloramos a calidade de vida e a saúde de moitas persoas».
Da importancia do novo servizo dan idea os números: ata o 70% das amputacións que se realizan no Chuac afectan a diabéticos, unha patoloxía que sofre o 12% da poboación -un terzo nin sequera o sabe- «e moitas destas persoas van ter un risco importante de úlceras», advirte o especialista. Unha costura nun zapato, unha pedra que se coa no pé abondan para que o enfermo, coa sensibilidade diminuída pola diabetes, acabe sen nin sequera darse conta cunha ferida cuxa evolución pode ser fatal. «Agora mesmo, os pacientes chégannos xa moi evolucionados e en moitos casos xa non nos queda máis remedio que cortar», explica. Pór en marcha a unidade persegue precisamente atallar o problema antes de chegar a eses extremos e para iso a base está en «integrar a todos os profesionais relacionados con este tema». Ademais dos vasculares, están chamados a participar endocrinos, hematólogos, rehabilitadores, internistas e, de forma decisiva, tanto a enfermería de atención primaria como a de especializada, equipo ao que se confía en sumar figúraas do podólogo, que por agora non está incluída no persoal do Sergas.