Será o 25 de maio, para maiores de 65 anos. O goberno local visitou este xoves á veciña máis lonxeva do municipio, Josefa Liñeiro
09 may 2024 . Actualizado ás 17:53 h.Vimianzo e Zas xa celebraron as súas e as seguintes serán as da Laracha (este sábado 11) e Cerceda (18). É tempo de Festas dous Maiores e tamén a haberá en Muxía , o sábado 25 e organizada polo departamento de Cultura, que presentou ao artista José Costa como gran «estrela» para ese día. Seu é o icónico Como baila Carmiña. Trío Baía e Xaramiños do Corpiño tamén amenizarán a velada, que comezará ás 12.00 cunha misa no santuario e seguirá ás 14.00 co xantar no pavillón. Quen queiran acudir —65 anos, maiores de 65 e pensionistas— deben retirar entrada na oficina habilitada na primeira planta do consistorio, de 10.30 a 14.30. Como xesto de cariño, o goberno local muxián acudiu de sorpresa á casa da veciña de máis idade, Josefa Liñeiro, para entregarlle a invitación á celebración. Con 102 anos e medio, estaba palillando, ¡e sen lentes! Unha vida de crianza e redes que ten historia.