Venceron ao A Gaiola (5-1) e mantéñense no alto da Preferente feminina
17 mares 2024 . Actualizado ás 16:35 h.O Fisober repúxose do doloroso tropezo en Vilalba da mellor forma. Coa capitá Ana e a recentemente operada Barca Toba nas bancadas por lesión, as costeiras atoparon pronto o gol da tranquilidade para pórse a facer o que mellor sabe, apabullar aos seus rivais a través de rápidas transicións e con calidade no ataque. Ante A Gaiola, Paula Fandiño, con dous goles, e Patri Romaní deixaron encarrilado o duelo antes do descanso. As visitantes recortaron distancias xusto ao arrincar a segunda parte, pero outro tanto de Fandiño e un de Sharay situaron o definitivo 5-1 no marcador do Conco.
Con este resultado, as xogadoras dirixidas por Fran Toba mantéñense no máis alto da Preferente feminina, con tres puntos máis que o Vilalba, o seu único verdugo, por partida dobre, nesta tempada. Por diante, o Fisober ten sete xornadas nas que depende de si mesmo. Os rivais serán: Viaxes Amarelle B (7º clasificado), Balaídos (10º), Carballiño (13º), Cidade de Pontevedra (5º), Atlético Arnoia (6º), Begonte (8º) e Composala (11º).
Tamén no Conco xogou, máis tarde, o equipo masculino, que venceu 7-5 ao Estrada. Un triunfo que os clasifica para a seguinte rolda da Copa de Primeira Autonómica.