Denodo, do larachés Anxo Viña, lidera a nivel mundial o sector das tecnolóxicas
CARBALLO
O seu exclusivo software sempre chamou a atención dos grandes investidores
31 dic 2023 . Actualizado ás 11:10 h.O larachés Anxo Viña era en 1999 profesor universitario e por aquel entón converteuse nun visionario. Sobre todo en algo que, por aquel entón, estaba en fase moi embrionaria, a xestión de datos. Daquela idea xurdiu Denodo, unha compaña que co paso do tempo consolidouse en todo un referente no denominado segmento do big data.
Se algo destacan os expertos desde sempre é a capacidade da compaña para liderar o sector teconológico. O seu exclusivo software sempre chamou a atención dos grandes investidores. Do 2004 ao 2017 Denodo tivo o aval e o apoio de Sandra Ortega, a través do seu conglomerado ROSP Coruña. Posteriormente contou co músculo financeiro de HGGC. Pero agora a compaña de Anxo Viña, que vive dacabalo entre o seu A Laracha natal e California, conta co investimento adicional de 313 millóns de euros, procedente dun dos fondos de referencia na xestión de activos. TPG, con sede social en San Francisco, súmase a este proxecto ao considerar que Denodo posúe a mellor tecnoloxía no que á xestión de datos empresariais refírese. Con TPG e HGGC, a compaña Denodo ten o futuro máis que consolidado e asegurado. Agora Anxo Viña ten como obxectivo que a compaña que fundou en 1999 saia a Bolsa nun prazo máximo de tres anos. Denodo ten tres centros teconológicos, na Coruña, A India e Estados Unidos, e está presente en 25 países.
Automóbil
Se hai un grupo que deu un salto cualitativo, que será visible no 2024, é Dimolk. A firma carballesa da familia Díaz Molk acaba de unificar para Peugeot a súa marca como Dimolk Automoción, deixando atrás outras como Tumosa, que se empregaba nas instalacións de Oleiros, ou Dimonorte, no Milladoiro, que cobre todo Santiago e a súa área de influencia. De forma paralela, acaba de adquirir un novo concesionario en Narón para cubrir toda a comarca de Ferrolterra, un centro de máis de 4.000 metros cadrados. Con estes cambios introducidos Dimolk convértese no único concesionario oficial de vendas Peugeot na provincia, ademais de contar coa casa de vendas de Antamotor, do grupo Nissan.