Rianxo pon en marcha o seu programa de compostaxe comunitaria en cinco espazos
RIANXO
O Concello pon a disposición dos veciños cubos para a separación dos residuos orgánicos
25 mares 2024 . Actualizado ás 17:39 h.Desde hai uns días, están operativas as illas de compostaxe comunitaria instaladas polo Concello de Rianxo en cinco puntos da vila. Deste xeito ponse en marcha un programa que pretende mellorar a xestión dos residuos reducindo a fracción resto e elaborar abono natural de alta calidade a partir dos refugallos orgánicos.
As cinco illas que xa están a disposición dos veciños atópanse en Punta Fincheira, en Rianxiño , na rúa Rosalía de Castro (no lateral do pavillón municipal), xunto ao centro de saúde e na intersección entre cálea Arcos Moldes e a urbanización A Martela. Estes recipientes están destinados exclusivamente ao depósito de biorresiduos, que deben separarse adecuadamente nos fogares. Para iso, o Concello tamén pon a disposición da cidadanía uns cubos que poden recollerse gratuitamente no Museo do Mar. Xa se repartiron máis dun centenar e o obxectivo do goberno local é acadar o medio milleiro.
En canto ao uso das illas de compostaxe, é sinxelo. Os residuos orgánicos correctamente separados deposítanse no módulo correspondente sen bolsa e a continuación bótaselles amais unha capa de triturado ou estructurante que os usuarios atoparán ao lado do compostero e péchase a tapa. O tipo de lixo que pode utilizarse para a elaboración de compost vai desde toda clase de alimentos, crus ou cociñados, a ósos, espiñas e cunchas, cascas de ovo ou froitos secos, pousos de café e infusións, papel de cociña branco (sen debuxos) e restos de pequenas podas.
Para máis información, os interesados poden dirixirse ao departamento de Medio Ambiente do Concello rianxeiro.