O orzamento de Porto do Son aumenta un 4,86 % e supera a barreira dos 12 millóns
PORTO DO SON
O documento, que prevé un gasto de 3,4 millóns en investimentos, xa está a exposición pública tras o visto e prace do pleno
25 abr 2024 . Actualizado ás 17:07 h.A cómoda maioría absoluta do PP en Porto do Son permite ao goberno que encabeza Luis Oujo sacar adiante os seus proxectos en pleno sen maiores contratempos, como ocorreu cos orzamentos municipais para o presente exercicio. O executivo sonense disporá este ano de máis de 12 millóns de euros, tras un incremento do 4,86 % do importe total da contas.
Oujo mostrábase satisfeito co proxecto económico aprobado inicialmente —está xa a exposición pública para consultas e a posible presentación de alegacións—, sobre todo polo contexto no que se elaborou: «A liquidación do ano pasado foi positiva, os remanente tamén... e este ano conseguimos aumentar o presuposto nunha situación difícil polo incremento dos gastos correntes». Esta subida hase equilibrado con máis ingresos, ata acadar un montante total de 12.346.255 euros, 571.829 euros máis que o importe dos orzamentos do 2023.
Aínda que aumentan os gastos correntes, derivados do encarecemento da enerxía e as subministracións e de subidas salariais, o goberno sonense reserva unha partida moi importante para o apartado de investimentos. Non en balde, a contía total deste capítulo ascende a 3,4 millóns de euros.
Actuacións destacadas
Por importe, unha das actuacións máis destacadas das recollidas no documento de orzamentos é o proxecto de eficiencia enerxética para a renovación da iluminación pública, unha iniciativa financiada polo IDAE e que acada a súa terceira fase, por un importe de 505.143 euros: «Unha vez se execute, quedará unha última fase, a cuarta, para acadar o 100 % do alumeado con luces led», explicou Oujo.
Na folla de ruta do executivo sonense para o presente exercicio está a continuidade da obras de humanización en núcleos rurais, de maneira que este ano está previstas novas actuacións na Silva, en Basoñas e en Cruceiro. Así mesmo, o rexedor sinalou que seguirán investindo en saneamentos, a mellora do abastecemento e a recuperación do litoral, cunha nova actuación na zona de Boa.
O orzamento tamén recolle unha partida para a adquisición dos terreos para levantar o novo colexio de Portosín, así como a compra do edificio de Outeiro Alto que se converterá no futuro centro de saúde de Porto do Son.
Ademais dos investimentos, Luis Oujo destacou dúas importantes partidas: «Consignamos un millón de euros para a licitación do SAF e tamén a partida para licitar o centro de día».