O Natural Sport proclamouse campión en todas as categorías dos campionatos galegos cadete e sub-21 e o Suh Sport e o Malamía pisaron o podio
BARBANZA
Os da capital barbancesa gañaron tres dos catro campionatos oficiais, á espera de que se celebre o júnior no próximo mes de abril
27 mares 2024 . Actualizado ás 11:27 h.Betanzos acolleu a celebración dos campionatos galegos cadete e sub-21 de taekuondo, nos que reinou o Natural Sport. Os barbanceses proclamáronse campións en todas as categorías, do mesmo xeito que fixeron no torneo absoluto disputado recentemente en Monforte. Desta forma, o equipo de Ribeira faise con tres dos catro campionatos oficiais a falta de que se celebre o próximo mes de abril o júnior.
«Estamos moi orgullosos de todos os nosos deportistas. O seu rendemento foi espectacular e algúns, aínda en etapa cadete, demostraron unha madurez incrible. Evidentemente, estamos moi satisfeitos e contentos. Queremos destacar a volta aos tapices de Carme Santamaría, despois dunha operación que a tivo oito meses sen competir. Ela é un dos nosos maiores activos e, sin duda, foi unha inxección de moral para todos. Agora toca baixar a intensidade uns días, descansar un pouco e volta ao traballo para encarar todo o que vén», sinalaron no Natural Sport.
Os da capital barbancesa sumaron 13 medallas na categoría cadete, con Amy Ndong e Rodrigo Fernández sendo elixidos mellores competidores do torneo. Na sub-21, o botín foi de 18 preseas, sendo Noa Romero a máis destacada da cita.
Nesta cita tamén estivo presente o Malamía, que volveu a Boiro con dous ouros, unha prata e un bronce. Ao primeiro caixón do podio subir Keila Crujeiras, en cadete, e Ana García, en sub-21. Mateo Calo perdeu a final cadete e tívose que conformar co subcampeonato, mentres Adrián Hermo se colgou o bronce en sub-21.
Begoña Pouso, Marte Ferreira e Roi do Río acabaron o torneo sendo quintos.
Por outra banda, no Suh Sport celebraron a medalla de prata de Diego Lijó, que gañou tres combates e caeu nunha dura final. En sub-21 participaron os júniores tendo variacións nos seus pesos. Pablo Torrado foi bronce nunha categoría que supera en seis quilos a súa habitual. Tamén se subiu ao terceiro caixón do podio Irene Rodríguez.
Rodrigo Caamaño e Hugo Resúa asinaron senllas quintas prazas.