A falta dun colector, a xente guinda as flores secas sobre o asfalto ao pé das ruínas de Santa Mariña
14 feb 2024 . Actualizado ás 05:00 h.Co permiso da praza de Fefiñáns, a outra xoia da coroa do conxunto histórico-artístico de Cambados son as ruínas de Santa Mariña Dozo. Os restos desta igrexa do século XV exemplos do gótico mariñeiro foron declaradas Monumento de Interese Turístico Nacional en 1943 e convertéronse nun punto de visita obrigada para todo aquel que acode á localidade.
A maxestosidade dos seus arcos de pedra non deixa a ninguén indiferente, nin tampouco o cemiterio que creceu ao seu redor, que desde 2014 formas parte da Asociación de Cemiterios Singulares de Europa. Estes méritos deberían ser suficientes para coidar a imaxe deste espazo, pero esta deixa moito que desexar. Ao pé do muro perimetral, na entrada principal, se apilan e podrecen as flores secas e outros desperdicios que guindan os usuarios do camposanto.
Ata o mes de novembro había alí un colector, pero un día desapareceu —descoñécese o motivo— e non se volveu a repor nin se reporá. Explica o concelleiro de Obras e Servizos, José Ramón Abal, que non é oportuno facelo tendo en conta o impacto visual que supón este tipo de elemento nun lugar tan singular como leste. Anos atrás colocouse alén da rúa unha estrutura en madeira a modo de caixón co fin de ocultar o recipiente do lixo á vista dos turistas e dos seus cámaras, pero o Concello acabou retirándoo a petición dos veciños da zona.
Agora, a falta de colector, hai quen opta por tirar os desperdicios na rúa no canto de camiñar uns metros e utilizar os colectores que hai ao lado do Museo do Viño ou na parte traseira do propio cemiterio.
José Ramón Abal fala dun problema de «civismo» e anuncia que tomará medidas: colocarase cartelería advertindo da prohibición de guindar lixo ao chan e contactará coa propiedade do tanatorio situado ao lado do cemiterio para solicitarlle que autorice o uso do colector situado no recinto. O obxectivo é darlle máis facilidades a quen acoden a cambiar as flores das sepulturas, aínda que o tanatorio non está aberto todos os días nin acotío. Entre tanto, os residuos seguían onte sobre o pavimento, degradándose polo efecto da choiva e o sol.
Non é o único problema de imaxe que presenta o cemiterio. Dentro, especialmente na parte nova, as herbas crecen ás súas anchas sen que ninguén as corte porque o camposanto é parroquial e a Igrexa non se fai cargo deste labor.
O Concello de Cambados solicitou hai anos a cesión deste espazo para que pasase a ser de titularidade municipal e asumir así a súa xestión, pero o acordo co Arcebispado de Santiago non foi posible e a maleza gaña terreo cada día que pasa. Con todo, os operarios do Concello córtana e limpan polo menos dúas veces ao ano coincidindo con Defuntos e o inicio da tempada estival.