Os abonados poden comprar entradas a nove euros para tribuna 2
29 abr 2024 . Actualizado ás 20:36 h.O Monbus Obradoiro recibirá o sábado ás 20.45 horas o Morabanc Andorra en busca dunha vitoria que alimente as opcións do equipo para continuar na ACB a próxima tempada. O club agarda unha boa entrada en Sar e á promocións que xa puxo en marcha para a recta final de tempada engadiu a opción de que os abonados poidan comprar entradas para a bancada de tribuna 2 ao prezo de nove euros, ata esgotar localidades.
Nas bancadas de fondo xa non queda papel á venda. Nas retractiles, apenas trinta entradas, e en tribuna 1, menos de vinte.
En tribuna 2 hai máis dispoñibilidade. A última hora da tarde quedaban aínda 400, pero todo apunta a que se colgará o cartel de cheo ou, cando menos, Sar rexistrará unha das mellores entradas da tempada nun partido que pode ser decisivo.
Guerrero , con máscara
No plano deportivo, o equipo fai fronte a unha mala serie de contratempos físicos. O último en sumarse á lista foi Rubén Guerrero , no WiZink Center.
Álvaro Muñoz é baixa de longa duración pola rotura de ligamento cruzado que sufriu no partido ante o Xirona. Kovliar leva algo máis dun mes no dique seco. E a Madrid tampouco viaxou Rigoberto Mendoza, convalecente dunha afección vírica con febre que lle obrigou a gardar cama. Janis Timma, que xogou con molestias nas costas ante o Manresa e perdeuse o partido de Bilbao, si entrou na convocatoria, pero non chegou a participar no xogo. E no transcurso da contenda sumouse á lista Rubén Guerrero , que levou unha cotenada involuntaria de Yabusele no nariz, nunha xogada na que se interpuxo ante a á pivote francés e chegou a taponar o seu intento de canastra cando trataba de afundir o balón no aro.
O andaluz tivo que retirarse ao banco, sangrando de xeito considerable. E xa non volveu xogar.
Non é a primeira vez que sofre unha lesión no nariz. En febreiro pasou por unha situación parecida e puido xogar tras recibir unha mascara protectora personalizada que luciu en varios encontros e que terá que recuperar esta fin de semana para o partido ante o Andorra.
Os xogadores do Monbus Obradoiro gozaron onte dunha xornada de descanso e hoxe renovarán o traballo. Moncho Fernández estará pendente da evolución das molestias de Timma nas costas e tamén de Rigoberto Mendoza.