Moncho Fernández: «Faltounos a brillantez ofensiva que necesitas para gañar ao Real Madrid»
ANDAR MIUDIÑO
O adestrador do Obradoiro ve ao equipo comprometido e preparado para remontar na clasificación
28 abr 2024 . Actualizado ás 19:28 h.As roldas de prensa da maioría dos adestradores visitantes nos partidos ante o Real Madrid adoitan ser breves. A comparecencia de Moncho Fernández no WiZink Center non foi unha excepción.
Empezou coa habitual avaliación do partido, pondo o acento nun aspecto, a falta de acerto en ataque: «Falabamos de que tiñamos que facer un partido moi bo no aspecto defensivo e no ofensivo para poder gañar aquí. Creo que defensivamente estivemos bastante ben durante todo o partido, en liñas xerais, con erros, como non pode ser doutro modo, con moi boa predisposición e un gran traballo. Pero creo que nos faltou a brillantez ofensiva que necesitas para gañar ao Real Madrid. O 11/32 no terceiro e cuarto cuarto en tiros de campo creo que é unha boa mostra. Faltounos un pouquiño de acerto. É certo que algunhas son por mérito da defensa do Real Madrid, que o fixo francamente ben, pero creo que noutras nos faltou un pouquiño de acerto que nos permitise manternos preto no marcador. No que se refire ao esforzo, as ganas, a loita e demais, a verdade é que teño que felicitar aos xogadores».
Tamén apuntaba o Alquimista de Pontepedriña a unha fase crave do terceiro cuarto, na que o Real Madrid iguala primeiro o marcador e acaba abrindo unha pequena fenda. Chegou un escenario temido, o da escapada, a propósito de antemán da «dificultade para volver». E así o describiu: «Eses momentos coinciden con que fallamos tres tiros libres practicamente consecutivos, dous full ups, un tiro de tres. En cambio o Madrid castigounos. E cando o Real Madrid colle unha vantaxe, pois é complicado volver. Pero estou contento por todo o que foi o traballo e a predisposición do equipo».
Esta vez os resultados da xornada foron contrarios aos intereses do Monbus Obradoiro, que volve a postos de descenso. Moncho Fernández proclamou a súa confianza no grupo para reverter a situación nas tres xornadas que restan: «Estamos concienciados do que queremos facer, xogamos ao baloncesto, os xogadores xogan ao baloncesto por isto, para pelexar por cousas importantes, e para nós é moi importante o que hai en xogo. No que se refire a compromiso, loita e demais, estou convencido de que o equipo vai estar ao 100 % e iso vainos a axudar a conseguir as vitorias que necesitamos».