O pivote ucraíno, que capturou 16 rebotes de marca ante os murcianos e igualou o rexistro de Mike Muscala de fai dez anos, é o terceiro máximo anotador na historia do conxunto compostelán na ACB
11 ene 2024 . Actualizado ás 15:16 h.O pivote ucraíno Artem Pustovyi superou os mil puntos (1.003) como xogador do Obradoiro na ACB e mantense no top 3 por detrás de dous auténticos cañoneros como Corbacho e Robertson. O xigante obradoirista acadou este rexistro no último cuarto, no minuto 36 de xogo, establecendo no marcador un adverso 69-73. O aleiro canadense Thomas Scrubb, cuarto na clasificación histórica, quedou agora con 995 puntos, tras os 15 que acadou ante o Murcia este venres.
A clasificación de anotadores lidéraa o mallorquino Alberto Corbacho, que a base de triplos milagrosos acadou os 1.785 puntos, cifra aínda moi afastada para Pustovyi e Scrubb. Máis preto, aínda que bastante lonxe, están os rexistros do canadense Kassius Robertson, outro especialista desde longa distancia que, a pesar da súa curta estancia en Sar, deixou as súas estatísticas en 1.431 puntos.
Por detrás de Pustovyi e Scrubb, con máis de novecentos puntos, están o grego Kostas Vasileiadis (940) e o lituano Eimantas Bendzius (925). O top 10 complétano o aleiro polaco Adam Waczynski (819), o xigante lituano Laurynas Birutis (780), o base andaluz Pepe Pozas (762) e a á-pivote canadense Levon Kendall (756). Un total de dezasete xogadores superan os cincocentos puntos na historia do Obradoiro na ACB.
Do persoal actual, ademais de Pustovyi e Scrubb, outros catro xogadores atópanse instalados no top 50. Trátase de Álvaro Muñoz (posto 19 na lista, con 472 puntos), Fernando Zurbriggen (28, con 394), Álex Suárez (29, con 390) e Marek Blazevic (posto 35, con 354 puntos). O base arxentino superou neste encontro ante o Murcia ao de Mahón e igualou a Angelo Caloiaro.
Grandes rexistros
Pustovyi, con 1.878 puntos e 4.039 minutos na ACB coas camisetas de Obradoiro, Barcelona, Gran Canaria e Murcia, cumpre a súa cuarta campaña en Sar, na súa segunda etapa. Suma co conxunto compostelán un total de 110 encontros (228 na Liga Endesa). Recentemente superou os mil créditos de valoración na caldeira (1.146).
Ante o Murcia conseguiu o seu terceiro triplo na Liga Endesa, segundo co Obradoiro. O seu primeiro lanzamento con éxito desde longa distancia foi fai un par de semanas, tamén en Sar, fronte ao Real Madrid. Contra o Murcia volveu anotar o triplo no terceiro cuarto, establecendo un favorable 52-48 aos vinte e catro minutos e medio de xogo.
Ademais, asinou o seu mellor rexistro na pintura nos seus nove cursos na competición. Fronte aos pimentoneros capturou 16 rebotes (8 ofensivos). O ucraíno é líder histórico en rebotes, tamén en rebotes defensivos e en rebotes ofensivos, en tapóns, en tiros de dous e en mates.
Os minutos de Scrubb
Thomas Scrubb é o cuarto xogador con máis minutos na historia do Obradoiro (2.452). Superou ante o Murcia os 2.434 de Pavel Pumprla. Ademais, xa está moi preto dos mil puntos, no seu terceiro curso na capital galega. O canadense leva 83 actuacións co Obra e un total de 2.452 minutos xogados. Tamén superou recentemente os mil créditos de valoración (1.194) e anotou o seu triplo número 100 como obradoirista. O canadense, en só dous cursos e medio, é o segundo xogador máis valorado na historia do Obra e o segundo en rebotes e en rebotes ofensivos. É terceiro en tiros de dous.
Nemanja Radovic
A á-pivote montenegrino, Nemanja Radovic, acadou cos seus catro créditos en Sar os tres mil de valoración nos seus once tempadas na ACB. O exjugador do Obradoiro (estivo en Santiago na campaña 2017-2018) cumpre a súa oitava campaña no Murcia, militando tamén durante dous cursos no Zaragoza. Contabiliza 3.000 créditos, 331 partidos, 2.980 puntos e 6.590 minutos. Na súa etapa no Obradoiro, Radovic sumou 293 créditos en 33 partidos, con 687 minutos e 304 puntos (53,6 % en tiros de dous e 57,4 % tiros libres).
MÁXIMOS ANOTADORES DO OBRADOIRO NA ACB
Xogadores Puntos
1. Alberto Corbacho 1.785
2. Kassius Robertson 1.431
3. Artem Pustovyi 1.003
4. Thomas Scrubb 995
5. Kostas Vasileiadis 940
6. Eimantas Bendzius 925
7. Adam Waczynski 819
8. Laurynas Birutis 780
9. Pepe Pozas 762
10. Levon Kendall 756
11. Pavel Pumprla 705
12. Vladimir Brodziansky 674
13. Nacho Llovet 646
14. Oriol Junyent 550
15. Javier Bulfoni 547
16. Rafa Luz 543
17. Mike Daum 500
18. Ben Dewar 496
19. Álvaro Muñoz 472
20. Matt Thomas 463
28. Fernando Zurbriggen 394
29. Álex Suárez 390
35. Marek Blazevic 354
ARTEM PUSTOVYI iguala a marca de rebotes de MUSCALA no Obradoiro
O Obradoiro non puido pechar o 2023 cunha última vitoria en casa ante Murcia. Estivo preto, en boa parte, grazas á exhibición antolóxica que asinou Artem Pustovyi baixo os taboleiros do Sar. Ademais de anotar 15 puntos e colocar 4 tapóns para 28 créditos de valoración, o pivote de 31 anos pulverizó o seu tope de rebotes en Liga Endesa (16) coa que é a mellor marca de toda a traxectoria do Obradoiro na competición. Tamén 16 rexeites logrou capturar Mike Muscala fai dez anos.
No caso de Pustovyi, a metade deses rebotes (8) producíronse na canastra de ataque, cifra que queda ás portas de levar por diante outra marca. O de capturas ofensivas do conxunto obradoirista. Deixan Kravic fíxose con 9 en ata dúas ocasións ao longo da tempada 2019-20.