Suspendido preventivamente un parque eólico tramitado entre Alfoz, O Valadouro e Mondoñedo
O Valadouro
O TSXG adopta esta medida tras unha sentenza do Tribunal Supremo
06 mares 2024 . Actualizado ás 13:47 h.O Tribunal Superior de Xustiza de Galicia (TSXG) resolveu a suspensión cautelar da resolución que concede autorizacións administrativa previa e de construción ao parque eólico Figueiras, proxectado pola sociedade mercantil Fergo Galicia Vento PEE nos municipios de Alfoz , O Valadouro e Mondoñedo.
O TSXG resalta que «tras a sentenza emitida polo Tribunal Supremo (TS) o pasado mes de decembro, adaptou os criterios á hora de decidir sobre medidas cautelares respecto a parques eólicos. Desde esa resolución do alto tribunal, que rexeitou dúas das causas que o TSXG tivo en conta para decretar a anulación dalgunhas instalacións, ambas relacionadas co prazo do trámite de información pública no procedemento de avaliación de impacto ambiental seguido antes de ditarse a autorización dos proxectos e do acceso aos informes sectoriais polo público interesado nese trámite», argumenta. Dese modo, decreta a suspensión cautelar de ata 13 instalacións en Galicia, un deles o mencionado.
O proxecto incluía a construción de cinco aeroxeradores e unha torre meteorolóxica de medición de 117,5 metros de altura e unha potencia de 22,5 MW. A asociación ecoloxista Petón do Lobo pedira a suspensión cautelar do parque eólico, entendendo que causaría, segundo recolle a sentenza do TSXG, «unha afección severa e directa a hábitats prioritarios e de interese comunitario, así como a especies catalogadas e en perigo de extinción, do mesmo xeito que á proposta de ampliar a Rede Natura 2000 coa lista do lugar de importancia comunitaria (LIC) Serra do Xistral». Contra o fallo cabe recurso de reposición.