Establece dous núcleos urbanos e 117 rurais e cataloga ata 153 elementos do patrimonio arqueolóxico, arquitectónico e etnológico
06 mares 2024 . Actualizado ás 19:11 h.A Xunta de Galicia aprobou este martes de forma inicial o Plan Básico Municipal (PBM) do municipio de Alfoz , que permitirá ao concello mariñán contar cun instrumento de ordenación urbanística. A conselleira en funcións de Medio Ambiente, Territorio e Vivenda, Ángeles Vázquez, asinou a correspondente resolución xunto á alcaldesa alfocesa, Efigenia Maseda.
O PBM de Alfoz establece dous núcleos urbanos e 117 rurais, repartidos en nove parroquias dos que 79 son tradicionais e catro comúns. Outros 34 combinan as dúas condicións.
O documento identifica e cataloga ata 153 elementos do patrimonio arqueolóxico, arquitectónico e etnológico, dos que 28 están declarados Ben de Interese Cultural (BIC).
O Plan Básico Municipal permite dotar aos concellos de menos de 5.000 habitantes dunha ferramenta para unha ordenación urbanística responsable e sostible, que pretende dar seguridade a residentes e posibles investidores.
Deste xeito, Alfoz é o décimo cuarto municipio de galicia e o sétimo da provincia que supera este trámite. Catro Plans Básicos Municipais —os do Páramo, Trabada, Riotorto e Ribeira de Piquín— foron aprobados en Lugo definitivamente.